Inougurashon di kamerín na SDK
Publiká riba 26 Mart 2023
WILLEMSTAD – Den kuadro di profeshonalisashon di fasilidatnan deportivo konforme e maneho di Gobièrnu di Kòrsou, direktor di Fundashon Desaroyo Deportivo Kòrsou (FFDK) sr. Vergilly Winklar a hasi inougurashon di e promé kamerín ku a keda kla na Sentro Deportivo Kòrsou (SDK). Esaki a sosodé den presensia di Minister di Enseñansa, Siensia, Kultura i Deporte sr. Sithree van Heydoorn i Presidente di Federashon Futbòl Kòrsou (FFK) sr. Ramiro Griffith. Direktor di FDDK sr. Vergilly Winklar a duna splikashon i mustra riba e hecho di desaroyo deportivo i konforme e maneho di Gobièrnu mester krea fasilidatnan profeshonal pa nos deportistanan.
Esaki ta pa stimulá aktividatnan deportivo riba nos pais i asina krea un desaroyo profeshonal, duradero i promoshon di turismo deportivo. E akomodashonnan mester tin kamerín i kambernan na nivel internashonal pa aloká deportistanan nashonal i internashonal. P’esei a traha riba e promé kamerín i ta pa promové e weganan internashonal i profeshonalisá nos akomodashon deportivo. Selekshonnan nashonal i internashonal ta bai hasi uzo di e fasilidat aki na SDK. Den un próksimo fase ta drecha mas kamerín.
Ku esaki Minister sr. Sithree van Heydoorn enkargá ku deporte ta enfatisá ku deporte tin tur atenshon i ku e ta traha na bienestar di Pueblo di Kòrsou.
—
KOMUNIKASHON
**riba e potrètnan athunto por tuma nota di e inougurashon.