Publiká riba 19 Febrüari 2022
Historia ta konta ku na 1963 e tim di beisbòl Santa Maria Pirates a keda fundá. E personanan ku a lanta Santa Maria Pirates ta sr. Frank Curiel, sr. Robert Lebacks, sr. Wilbert “Ibi” Pieternella i sr. Aquiles Boelein. E tim no tabata tin un tereno propio i a kuminsá un trayekto pa haña un tereno pa por praktiká e deporte di beisbòl. Na 1968 Gobièrnu a otorgá e tereno akí na e organisashon di Sta. Maria Pirates pa usa komo nan kancha deportivo. E personanan ku a hunga un ròl importante den esaki tabata sr. Boy Rozendaal, sr. Jongheer i sr. Onofre Bikker (tur defuntu). Sr. Hermanito Filé, tambe den felis memoria, tabata e motor ku a aserká Gobièrnu i kana tras di e petishon. Na aña 1995 e nòmber ofisial a bira Frank Curiel Ballpark, na e mes un aña a sende lus na e vèlt i na 2006 e vèlt a haña yerba.
Minister di Enseñansa, Siensia, Kultura i Deporte sr. Sithree van Heydoorn den su rekorido na e fasilidatnan deportivo a tuma nota di vários aspekto ku mester di atenshon. Minister van Heydoorn komo e titular enkargá ku deporte ku ta hiba un maneho di duna atenshon na nesesidat den e área deportivo, a duna oido na e situashon di e postenan di lus ku tin mas ku 25 aña i a kuminsá enkaminá un proseso pa por kristalisá renobashon di esakinan.
Ku gran satisfakshon i alegria, Minister van Heydoorn a hasi inougurashon huntu ku sr. Frank Curiel di e lusnan LED i a gradisí tur persona ku a karga i yuda den e trayekto akí. Di e manera akí Minister a demostrá di ta duna oido na e grupo di meta i fasilitá prosesonan pa por logra.
Gobièrnu por mira bèk riba un aktividat eksitoso i ta gradisí kada un ku a hasi e aktividat akí posibel.
**riba e potrètnan athunto por tuma nota di e inougurashon.
