Publiká riba 18 Ougùstùs 2025
WILLEMSTAD – Minister di Finansa i di Salubridat Públiko, Medio Ambiente i Naturalesa, sr. Javier Silvania, a hiba un kombersashon privá durante bishita di Sekretario di Estado di Asuntunan Interior, Relashonnan den Reino i Digitalisashon, sr. Eddie van Marum.
Siguidamente, Sekretario di Estado Van Marum, Minister Silvani i Minister Middelhof di Desaroyo Ekonómiko konhuntamente a bishitá Hòfi Cas Cora. E bishita a enfoká riba agrikultura duradero i e ambishonnan di Kòrsou pa fortalesé produkshon di kuminda lokal.
Minister Silvania a enfatisá ku Gobièrnu di Kòrsou ta implementá un Plan di Akshon pa kresementu aselerá den produkshon di agrikultura i di bestia. E plan akí ta enfoká riba oumentá seguridat di kuminda lokal, redusí dependensia di importashon i fortalesé empleo.
Minister Silvania: “Ku e plan di akshon akí, nos ta dal un paso grandi den direkshon di un suministro di kuminda duradero pa nos poblashon. Kòrsou ta opta pa un aserkamentu fundamental i stratégiko, ku un probabilidat haltu di éksito basta nos implement’é den koperashon estrecho. Esaki lo no solamente fortalesé nos propio seguridat di kuminda, pero tambe lo ofresé lèsnan balioso denter di Reino.”
E kombersashon privá i e bishita konhunto na Hòfi Cas Cora a reafirmá e importansia di desaroyo agrikultural komo prioridat stratégiko den e kolaborashon entre Kòrsou i Hulanda.
