Publiká riba 03 Yanüari 2024
Promé ku tur kos, nos ke deseá Pueblo di Kòrsou un Bon AŇA 2024. Tur aña di nobo nos ta yama e aña nobo bon biní ku yen di speransa i ku bon propósitonan, pasobra nos ke pa nos pais bai dilanti. Esei ta posibel, tanten ku nos tur duna di nos parti.
Mi a tuma nota ku sierto dokumentonan konfidensial i di karakter tékniko relashoná ku nos kompania Aqualectra, ya ta den publisidat, apénas 2 dia despues ku aña a habri. Esaki ta di lamentá ya ku esnan ku ta wòrdu nombra den un RvC sigur mester protehá e interes di e kompania den kual nan ta wòrdu nombra.
Djabièrnè dia 29 di desèmber 2023, atardi lat e rapòrt forénsiko a wòrdu di mail pa gerensia di Aqualectra i mi persona a risibí kopia di e mail aki. Natural un fin di siman di kambio di aña, ta imposibel pa Gobièrnu (AVA) òf mi persona komo representante di akshonista haña oportunidat di tuma nota di e kontenido, te pa mi studi’é i diskutié ku tantu esnan enkargá ku e operashon i servisio di e kompania Aqualectra òf ku komo e Instansia ku a traha e rapòrt. Mi ta lamentá e manera ku e proseso aki a kana.
Den publisidat ta aparentá komo si fuera e retiro di e tres miembronan di Konseho di Komisario a tuma lugá, komo “donderslag bij heldere hemel”. For di 30 novèmber 2023 Presidente Komisario a informá mi ku entrante 1 di Yanüari 2024 e ta tuma retiro, ya ku e tin otro enkargo den un institushon finansiero. Inmediatamente nos a tuma e medidanan nesesario pa inisiá e proseso pa nombra un Presidente Komisario nobo pa asina salbaguardiá interes di nos kompania Aqualectra.
Dia 27 di desèmber último, despues di vários luna, porfin e rapòrt forénsiko a keda kla, dia 29 di desèmber 2 miembro otro di e RVC di Aqualectra ta tuma nan retiro. Mi no sa si tin un konekshon entre e dos susesonan aki.
Aktualmente a keda un miembro den e RvC di Aqualectra i e proseso pa nombra e President Komisario ya ta kanando. Tin un kandidato pasando e proseso legal. Banda di esaki Gobièrnu a inisiá e prosedura pa yena e sobra vakaturanan inkluyendo esnan ku dia 1 di yanüari 2024 a bira konosí formalmente.
Pa ku e parti di e rapòrt forénsiko ku a keda kla, mi ke enfatisá ku ta riba mi proposishon i insistensia tantu RVC komo BTP a kuminsá ku e investigashonnan aki. Pues mi a sostené kompletamente ku e investigashonnan aki ta tuma lugá pa tin klaridat riba asuntunan interno di e kompania. Awor mester analisá e resultado di rapòrt pa nos por fiha e Kompas pa futuro di Aqualectra, na bienestar di Pueblo di Kòrsou.
Un kos si mi ke enfatisá, ta ku -sea pa bon òf pa malu- tur responsabel mester respondé i duna kuenta di rason di kualke situashon ku a surgi na Aqualectra. Un retiro no ta anulá ningun persona di su responsabilidatnan.
Tumando na konsiderashon ku e rapòrt a keda repartí bou di prensa, mi ke pidi enkaresidamente, pa duna Gobièrnu, e Instansia Forénsiko ku a traha e rapòrt i tur individuo enbolbí ku kualke responsabilidat den Aqualectra, chèns pa nos studia i trata e rapòrt na un manera profeshonal.
E kompania Aqualectra ta krusial den nos bida i pa desaroyo di ekonomia di Kòrsou. Ora tin black-out nos tur ta sufri i pais ta pèrdè.
P’esei mi ta supliká tur ku ta stima Adelanto Di Nos Pais Kòrsou, pa nos trata e rapòrt aki ku madures i na un manera profeshonal.
P’esei por lo pronto komo representante di AVA pa ku Aquaectralo mi no ta duna komentario riba e kontenido di rapòrt forénsiko, te ora nos haña oportunidat di formulá un punto di bista al respekto.
Akshon di lèk e rapòrt ku apénas a sali fresku den dianan di fin di siman di kambio di aña ta duna hopi di pensa!!!!!!!!!!
