Kòrda ku COVID tei ainda
Publiká riba 31 Òktober 2022
Willemstad – Departamento di Salubridat UO G&Gz (ántes GGD) di Ministerio di Salubridat, Medio Ambiente i Naturalesa ta urgí un i tur tuma nota di e siguiente rekomendashonnan. Aktualmente na Kòrsou ta sirkulá e variante Omicron. Esaki ta pega super lihé. Serkania di ménos di dos meter i mas largu ku 15 minüt por kousa kontagio.
No ta tur hende ta haña síntoma. Kiermen bo por pega otro ounke abo no tin síntoma.
- Mester hasi èkstra esfuerso pa no hiba e vírùs serka hende ku imunidat mas frágil, manera grandinan i hendenan ku malesa króniko.
- NO por distinguí entre COVID òf otro vírùs sin hasi tèst, kiermen si bo ta sinti algu protehá otronan!
Protekshon
Tapaboka ta importante pa disminuí e chèns di pega otronan. Tapaboka ta funshoná manera un filter ku ta fangu vírùsnan ku por ta saliendo for di bo boka i nanishi. Bisti tapaboka ora:
- ta den espasio chikitu i será, entre otro den outo/bus;
- ta den espasio kaminda lo por tin hende malu i fragil, entre otro den botika, konsultorio di dòkter, hospital, kas di grandinan;
- ta bishitá bo grandinan na kas;
- si abo ta sinti “fèrkout” bisti un tapaboka ora bo ta serka di hende;
- e tapaboka MESTER ta tapá for di nanishi te ku kachete, sino e NO ta hasi su trabou.
Sirkulashon di airu
- Den outo purba di uza ménos erko i mas bentana habrí, asta si ya kaba ta uzando tapaboka;
- Si bo ta bai topa famia/amigu hasi esaki den airu liber òf un lugá ku bon sirkulashon di airu;
- Sòru pa ora ta kuida hende malu, bentananan ta habrí i airu ta sirkulá.
Higiena
- Awa i habon ta preferibel pa tene man limpi, ora no por uza esakinan por uza gèl ku alkohòl (mas ku 60%);
- Man limpi ta importante ora ta kuida hende malu pa abo no pega;
- Man limpi ta importante ba abo no hiba ku trese e vírùs via man shushi pa otronan.
Zelftest
- Por hasi uzo di un zelftest si bo tin síntoma di fèrkout òf malu di barika;
- Zelftest ta optenibel na botika;
- E zelftest por sali negativo e promé dia di síntoma miéntras ku tòg bo tin COVID. Pa ta sigur ta bon pa ripití e tèst e siguiente dia.
Konsultá dòkter na tempu
- Yama e ofisina di bo médiko mesora ku sa e resultado positivo di e tèst. Por si akaso bo bira mas malu e ta na altura i por evaluá i guia e situashon mihó;
- No tarda pa yama un médiko ora e persona kuminsá sinti mas malu.
Ta nos kada un su resposabilidat di proteha nos mes, nos famia, nos sernan kerí, koleganan i nos komunidat kompletu. Pa ta bon informá tur momentu like i sigui nos riba nos página di facebook Ministry of Health, Environment and Nature.
###
