Publiká riba 04 Aprel 2023
Willemstad- Minister Ruisandro Cijntje a liderá un delegashon di Kòrsou durante e expo i konferensha di barkunan krusero di mas grandi globalmente kual ta e ‘Seatrade Cruise Global 2023’ ku a tuma lugá di 27 pa 30 di mart último na Fort Lauderdale. Minister Cijntje su bishita na e expo i konferensha akí tabata enfoká pa oumentá e kompromiso ku liñanan krusero pa asina krea i amplia oportunidatnan pa komunidat di Kòrsou i ‘stakeholdernan’ den e industria.
E delegashon di Kòrsou ku a biaha huntu ku Minister Cijntje a inkluí representashon di Curaçao Ports Authority (CPA), Maduro Shipping, Dijk Transport, FBTT Travel Curaçao i Fiesta Tours. Nos delegashon huntu ku e delegashon di Aruba i Boneiru a kompartí un ‘booth’ durante e expo akí pa promové nos destinashonnan. Minister Cijntje ta enfatisá ku, komo paisnan bisiña, nos tin e oportunidat pa alsa nos balor muchu mas pa e industria krusero dor di traha huntu. Pa medio di kolaborashon durante eventonan manera esaki, nos islanan por kapitalisá e situashon úniko ku nos tin. Komokiera, nos no ta kompetí komo islanan ora ta trata e industria krusero, mas bien nos ta komplementá otro ku eksperensianan úniko pa agregá na loke nos tin di ofresé.
Durante e expo i konferensha akí tabatin tambe e oportunidat pa reuní ku tur e liñanan krusero di mas grandi inkluyendo entre otro Royal Caribbean International, Carnival Cruises, Norwegian Cruise Line, Aida, Costa i Holland America Line. Minister Cijntje ta splika: “Nos ta eksplorando diferente oportunidat ku nos partnernan krusero, inkluso oportunidatnan pa subi kapasidat, promoshon di
kruseronan di luho, e posibilidat pa pasaheronan abordá barkunan krusero for di Kòrsou, uso sustenibel di e awanan residual di e barkunan, provishon di koriente sustenibel na momentu ku e barkunan ta mará den nos haf i embolbimentu di komunidat pa medio di programanan di arte.” E liñanan krusero ta sumamente optimista i ta kompartí ku Kòrsou ta keda un destinashon superior den nan portafolio ku semper ta skor haltu serka nan pasaheronan. Pa finalisá, Minister Cijntje ta indiká ku: “Nos ta den kombersashon pa un tempu kaba ku algun krusero di luho i aktualmente nos ta eksplorando e posibilidat pa esakinan por kuminsá bishitá Kòrsou den e temporada di 2024/2025. E expo i konferensia akí sin mas tabata eksitoso i ta na su lugá pa mi felisitá nos komunidat marítimo mirando ku tur liña krusero ku nos a hiba kombersashon ku n’e durante e expo i konferensia akí a ekspresá di ta sumamente impreshoná ku Kòrsou.”
