Publiká riba 14 Desèmber 2022
E Gobernador a keda akompaña pa su kasa i su delegashon di 6 eksperto. E miembronan di e delegashon ta Lucila Morelos Páez (Sekretaria di Edukashon), Gene Ogiste (lider di kalidat edukativo di Sekretaria di Edukashon), Fressman Avila (kordinadó general), David Cardona (kordinadó akadémiko) i Ricardo Gordon (eksperto pedagógiko).
Na e islanan akí tin un poblashon ku ta papia un lenga krioyo i nan ta siña spanó i ingles na skol. Un komunidat trilingwe, komparabel ku esun di nos, pero ku awor ta bai kuminsá ku e proseso pa introdusí nan lenga krioyo den edukashon. Nan ophetivo ta pa siña di nos proseso pa maneho di idioma i e papel di Papiamentu i lenganan stranhero den dje. E maneho di idioma di Kòrsou ta den proseso di ehekushon. El a keda aprobá pa Konseho di minister i Minister Sithree van Heydoorn a present’é tambe den parlamento. Despues ministerio a traha na un kuadro di implementashon i un plan pa organisashon i realisashon di e aktividatnan ku tin ku tuma lugá den e añanan benidero.
E bishita a keda kordiná pa dr. Marta Dijkhoff huntu ku un tim di Ministerio di ESKD. E delegashon a bishitá skolnan bilingual Papiamentu ingles (FSHP) i Papiamentu hulandes (RK i DOS). Tambe nan a hiba kòmbersashon ku ekspertonan den enseñansa i nan a bishitá e fundashonnan responsabel pa trahamentu di material na Papiamentu (FPI, FMS). Universidat (Fakultat General i LOFO) i organisashonnan deportivo i kultural tambe a keda bishitá.
Minister di ESKD sr. Sithree van heydoorn su idea ta pa yega den futuro serkano na un koperashon estrecho entre e paisnan pa siña di otro i sostené otro den e proseso pa inovashon di idioma den enseñansa i fortalesé lasonan kultural/deportivo.
—
KOMUNIKASHON
** riba potrètnan athunto por tuma nota di e bishita na Fòrtí serka Minister di ESKD sr. Sithree van Heydoorn. Pa mas potrèt por bishitá aki: Potrèt Gobernador di San Andres – Colombia
