Publiká riba 30 Sèptèmber 2023
Introdukshon di e promé Sistema Biométriko di Verifikashon di ID digital na Mundu
WILLEMSTAD – Ku sumo atmirashon i satisfakshon minister Cijntje ta selebrá e stap grandi ku Kòrsou ta dal den mehorashon di eksperensia di biaheronan pa medio di e proseso di kòntròl di frontera mas digitalisá, inovativo, fásil i lihé ku ta planiá pa keda lansá durante e promé mitar di 2024. E plannan pa lansamentu di e promé sistema móbil na mundu ku ta hasi verifikashon di ID digital durante e proseso di kontrol di frontera posibel a keda anunsiá djárason 27 di sèptèmber dor di Gobièrnu di Kòrsou huntu ku Curaçao Airport Holding.
Minister di Desaroyo Ekonómiko, Ruisandro Cijntje a indiká ku: “E programa nobo aki lo krea un eksperensia ameno pa nos turistanan, sin ku nan tin yen kos di kòrda durante e prosedura na aeropuerto. Di e manera aki rápidamente nan por ta kla pa eksplorá nos bunita isla”.
Di akuerdo ku Minister Cijntje, e sistema biométriko di verifikashon di ID digital aki ta un muestra kla ku Kòrsou ta un pais bon desaroyá i altamente kapasitá pa liderá mehorashon di eksperensia di biahereonan usando solushonnan progresivo ku ta brinda un eksperensia seif i sin interupshon. Minister Cijntje ta felisitá KPC, Immigratiedienst, ACTS, SBIR, Netvision, EY, Curaçao Tourism Board i Curaçao Airport Partners pa nan kolaborashon fruktífero pa a realisá e proyekto impaktaktante aki pa Kòrsou. E resultadonan di e proyekto aki indudablemente lo benefisiá nos sektor di turismo i nos ekonomia.
Minister Cijntje ta sigui e desaroyonan positivo na CUR, e aeropuerto internashonal di Korsou di aserka. Na 2022, e aeropuerto a konosé un kantidat rékòrt di 1,46 mion pasahero, kaminda rutanan internashonal a kontribuí na un kresementu notabel di 106% kompará ku 2019. Pa 2023 e aeropuerto ta konta ku aproksimadamente 1,6 mion pasahero i ta premirá un kresementu di mas o menos 10% pa aña. E kapasidat di 2,5 mion pasahero pa aña di CUR, definitivamente ta kontribuí na nos vishon pa mas kresementu den nos sektor turístiko.
