Publiká riba 25 Yanüari 2022
WILLEMSTAD – Ministerio di Enseñansa, Siensia, Kultura i Deporte (ESKD) ta informá ku kada bishita na un skol mester keda organisá konforme e reglanan vigente. E reglanan akí no ta regla ku Minister Sithree van Heydoorn a introdusí, pero ta reglanan ku semper tabata tei. Ta asina ku pa bishitá un skol públiko mester pidi outorisashon na direktiva di e skol.
Direktiva di skolnan públiko tin reglanan ku nan mester tene nan mes na djé pa por laga un persona òf organisashon drenta skol. Meta di e reglanan ta na promé lugá pa protehá e privasidat di mucha, maestro òf dosente i pa salbaguardiá seguridat na skolnan. Prinsipalmente awor akí ku mester tene kuenta ku e reglanan vigente relashoná ku e pandemia di COVID-19.
Un parti importante di esaki tambe ta pa enseñansa keda duná den trankilidat komo ku hopi biaha un bishita por trese distraishon i interupshon na e proseso di enseñansa. P’esei esaki mester keda prepará di forma ordená pa asina minimalisá e interupshon ku un bishita imprevisto por kousa. Tambe ta na su lugá pa – previo na un bishita – puntonan di agènda keda palabrá pa ámbos partido pa asina garantisá ku e interkambio di informashon ta kompleto i korekto. Esaki ademas ta sòru ku kaminda ta nesesario tur aktornan relevante tambe ta presente.
Resientemente un parlamentario a trata na bishitá un skol sin ku e Direktiva di Skolnan Públiko i e Kabes di Skol konserní a ser poné na altura na tempu pa por hasi e preparashonnan nesesario. Esaki a pone ku e bishita no por a sigui komo ku e direktiva di skolnan no a prepará esaki huntu ku funshonarionan, ni e tim di maneho konserní ku ta responsabel pa e skol. Semper e direktiva di skolnan mester pèrkurá pa garantisá kontinuidat di e proseso di enseñansa.
Ministerio di Enseñansa, Siensia, Kultura i Deporte huntu ku Direktiva di Skolnan Públiko semper ta habrí pa duna informashon i ta aploudí tur inisiativa, pero esaki semper mester kana konforme e reglanan vigente. Pa mas informashon den kuadro di bishita na skol por tuma kontakto ku e Direktiva di Skolnan Públiko na telefòn 466-6111 òf via di e-mail info@dos.edu.cw.
