Publiká riba 22 Yüni 2026
Desde ku el a sinta, e Minister enkargá ku Salubridat, Medio Ambiente y Naturalesa (GMN), Sr. Tyron Boekhoudt, a traha duru riba solushonnan struktural pa un kantidat di asuntunan urgente den e sektor di kuido médiko, banda di e reformanan nesesario den e sektor di kuido. Na momentu ku el a asumí responsabilidat pa ministerio di GMN, e Minister a haña un sektor ku tabata bou di hopi preshon riba diferente aspekto. Ku atenshon dirigí i medidanan, awor ta trahando riba solushonnan duradero pa asina e kontinuidat, kalidat, i aksesibilidat di kuido na komunidat di Kòrsou keda garantisá.
Sostenibilidat di hospitalnan
Un di e promé pasonan di Minister Boekhoudt tabata implementá solushonnan struktural pa CMC, inkluso un oumento supstansial di e presupuesto di kuido kompará ku den pasado. E medida aki ta forma e base pa mas stabilidat den kuido médiko aki na Kòrsou. Tambe a yega resientemente na un akuerdo pa loke ta trata sosten di gobièrnu pa Advent Hospital, pa asina hasi posibel su restrukturashon den e próksimo periodo pa realisá stabilidat finansiero i kontinuidat di servisionan di Advent. Den futuro, vários klínika lo drenta den un relashon di trabou estrecho ku CMC pa fortalesé kuido di spesialista médiko na Kòrsou.
Listanan di espera
E listanan di espera largu ta forma un reto grandi pa akseso na kuido. Despues di un bishita resien na Colombia, Minister Boekhoudt a konkluí ku tin sufisiente institutonan di kuido den region dispuesto pa manda temporalmente spesialistanan médiko, inkluyendo siruhanonan, i personal di kamber di operashon pa traha na Kòrsou. Minister Boekhoudt lo drenta den konsulta ku CMC pa hasi e palabrashonnan nesesario pa loke ta trata esaki, pa asina por baha e listanan di espera, loke ta hasi posibel pa yuda pashèntnan mas lihé.
Fortalesé e posishon di vários instituto di kuido
Tambe ta trahando aktualmente riba otro kasonan den e sektor di kuido ku ta rekerí atenshon urgente pa garantisá e kontinuidat den prestamentu di servisio di kuido na nos komunidat. E transishon di e servisio di ambulans FKAK ta den pleno marcha, ku e meta pa integr’é den e organisashon di gobièrnu pa 1 di yanüari 2027.
Resientemente tambe Minister a hiba kombersashonnan pa fortifiká e posishon di PSI SCUCHAMI riba término largu. Despues di Klínika Capriles, PSI SCUCHAMI ta un parti importante di kuido mental (GGZ) riba Kòrsou i ta p’esei e ta hunga un ròl indispensabel den kuido di gruponan vulnerabel den nos sosiedat. Tambe Minister Boekhoudt ta enfoká aktualmente riba e posishon di otro institutonan di kuido den e sektor di kuido di largu plaso, manera Brasami, Betesda, i Fundashon Duna Lus, pa asina hasi esakinan i otro institutonan di kuido médiko mas resiliente den futuro. E aktividatnan aki ta bin ku sierto retonan, pero Minister Boekhoudt ta enfatisá ku e medidanan tumá i esnan ku mester wòrdu tuma ainda ta parti di un aserkamentu mas amplio i struktural pa fortalesé e sektor di kuido médiko aki na Kòrsou.
Bista riba futuro serkano
Pues den e próksimo dos añanan e enfoke lo ta riba kontinuidat di kuido, e stabilidat di institutonan di kuido i redukshon di e listanan di espera, na bienestar di henter komunidat. Den e kuadro aki, un sistema sano i duradero di finansiamentu pa kuido médiko ta indispensabel. Ku esaki den mente lo ehekutá plannan pa e reforma di e sistema di seguro di malesa den e di dos mitar di e aña aki pa asina fortifiká e sistema aki pa hasié mas sostenibel den futuro.