Publiká riba 03 Yüni 2026
Bogotá, Colombia – 3 yüni – Komo parti di su bishita di trabou na Colombia, Minister di GMN Tyron Boekhoudt, huntu ku representantenan di SVB i e delegashon di Kòrsou, a bishitá e Centro de Tratamiento e Investigación sobre Cáncer (CTIC), un di e sentronan onkológiko mas avansá den nos region.
Durante e bishita, e delegashon a risibí un presentashon amplio tokante e organisashon, e forma di traha i e servisionan spesialisá ku CTIC ta ofresé. CTIC ta rekonosí pa su modelo di kuido ku un enfoke riba ‘e hende’, kolaborashon multidisiplinario i uso di teknologianan médiko avansá pa trata diferente tipo di kanser.
E delegashon a informashon amplio riba e manera ku CTIC ta integrá diferente spesialistanan den un solo proseso di kuido, kuminsando ku prevenshon i diagnóstiko, sigui pa tratamentu, rehabilitashon i despeus kuido posterior. Tambe a duna atenshon na tratamentunan inovativo den radioterapia i sirugia onkológiko.
Ademas, e delegashon a risibí un rekorido pa e fasilidatnan modernonan di CTIC. Durante e rekorido, nan a haña un bisti riba e infraestruktura, ekiponan médiko avansá i e kalidat haltu ku CTIC ta mantené den kuido di nan pashèntnan.
“E desaroyonan ku nos ta mira akí riba tereno di kuido onkológiko, teknologia i kolaborashon multidisiplinario ta impreshonante. Esakinan ta brindá konosementu valioso ku por yuda nos sigui mehorá kuido pa pashèntnan na Kòrsou,” segun Minister Boekhoudt.
E bishita na CTIC ta forma parti di un serie di bishitanan estratégiko den Colombia ku tin komo meta eksplorá oportunidatnan di kolaborashon, interkambio di konosementu i identifiká solushonnan inovativo pa un sistema di salú mas fuerte i sostenibel pa Kòrsou.
