Publiká riba 03 Yüni 2026
Bogotá, Colombia – 3 yüni – Komo parti di su bishita di trabou na Colombia, Minister di GMN Tyron Boekhoudt, huntu ku representantenan di SVB i otro miembro di e delegashon di Kòrsou, a bishitá Fundación Santa Fe, un di e institushonnan médiko mas prestihioso di Colombia i di nos region.
Durante e bishita, e delegashon a risibí diferente presentashonnan tokante e servisionan ku e institushon ta ofresé, ku enfoke spesial riba kardiologia, kuido pa kemaduranan i e organisashon general di e hospital. E presentashonnan a duna un bista amplio riba e kapasidat médiko, teknologianan avansá i e manera ku Fundación Santa Fe ta organisá kuido kompleho i di haltu kalidat.
Ademas di e presentashonnan, e delegashon a risibí un rekorido di e fasilidatnan di e hospital. Durante e rekorido, nan a por konosé e infrastruktura moderno, departamentonan spesialisá i e metodonan ku ta kontribuí na e kalidat haltu di kuido ku nan ta ofresé.
Minister Boekhoudt a enfatisá ku e bishita ta forma parti di e esfuersonan di Kòrsou pa fortifiká kolaborashonnan internashonal i promové interkambio di konosementu ku institushonnan di kuido ku ta lider den nan sektor.
“Pa sigui mehorá nos sistema di salú, ta importante pa siña for di institushonnan ku ta mundialmente rekonosí pa nan kalidat i inovashon. E tipo di bishitanan aki ta brinda konosementu balioso ku por kontribuí na desaroyo kontinuo di kuido di salú na Kòrsou,” segun Minister Boekhoudt.
E reunion a representá un oportunidat importante pa interkambiá eksperensianan, eksplorá áreanan di posibel kolaborashon i haña un miho komprondementu di e ekspertisio ku Colombia tin den tereno di kuido spesialisá.