Publiká riba 08 Yüli 2026
Willemstad, – Minister di GMN, Tyron Boekhoudt, tabata presente ayera anochi den e evento organisá pa Sea Turtle Conservation Curaçao, kaminda investigadónan, ekspertonan, boluntarionan i partnernan a reuni pa pone enfoke riba e protekshon di turtuganan di laman i nos ekosistema marino.
E minister a expresá su apresio pa presensia di Cónsul General di Merka, Chico Negrón, i tur invitadonan ku ta kontribuí na e protekshon di nos medio ambiente marino.
Un danki speshal ta bai pa Curd Evertsz, Dra. Manuela Tripepi i henter e tim di Sea Turtle Conservation Curaçao. Danki na nan dedikashon i trabou kontinuo den investigashon siéntífiko, edukashon, monitoreo i protekshon di turtuganan di laman, Kòrsou a logra hasi pasonan importante den e preservashon di su rikesa natural.
Minister Boekhoudt a enfatisa ku Kòrsou tin e oportunidat pa bira un ehèmpel den nos region dor di sigui invertí den konservashon, investigashon i kolaborashon. Dor di sigui traha huntu nos por sigurá ku nos medio ambiente marino lo keda protehá pa e siguiente generashonnan.