Publiká riba 03 Yüni 2026
Philipsburg, Sint Maarten – Minister di GMN, Tyron Boekhoudt, a firma un Memorandum of Understanding (MoU) renobá huntu ku representantenan di Aruba, Boneiru, Saba, Sint Eustatius i Sint Maarten den kuadro di Dutch Caribbean Agriculture, Livestock and Fisheries Alliance (DCALFA).
Ku e MoU aki, e seis islanan ta reafirmá nan kompromiso pa fortifiká kolaborashon regional riba tereno di agrikultura, peska i siguridat alimentario. E akuerdo renobá ta pone un fundeshi sólido pa un estrategia komun te ku aña 2035, ku enfoke riba mehorá siguridat alimentario, stimulá produkshon sostenibel i hasi e islanan mas resistente kontra reto global manera kambio klimátiko i interupshonnan den kadenanan internashonal di suministro di alimentashon.
Minister Boekhoudt a enfatisá e importansia di traha huntu pa garantisá un futuro mas sigur pa e region.
“Siguridat alimentario ta un nesesidat. Dor di uni nos forsa, nos por traha huntu pa un sistema alimentario mas fuerte, sostenibel i resistente pa nos islanan i pa e generashonnan ku ta bin.”
Durante e konferensia DCALFA na Sint Maarten, e islanan partisipante a kompartí konosementu i eksperensianan tokante produckshon di kuminda, inovashon, sostenibilidat i oportunidatnan ekonómiko den sektor di agrikultura i peska. Tambe a deliberá riba e siguiente pasonan pa profesionalisá DCALFA i fortifiká su papel komo plataforma regional.
Kòrsou ta sigui kompromete su mes ku kolaborashon regional i ku inisiativanan ku ta kontribuí na desaroyo sostenibel, kresementu ekonómiko i un nivel mas haltu di sostenibilidat alimentario den nos region.