Publiká riba 19 Mei 2026
Genève, 18 di mei 2026 — Minister Boekhoudt a partisipá ayera, komo parti di delegashon di Reino Hulandes durante e World Health Assembly anual di World Health Organization (WHO) na Genève, den un deliberashon internashonal di nivel haltu tokante e brote aktual di Ebola i e nesesidat pa fortifiká e maneho mundial di krisisnan di salubridat.
E deliberashon, organisá pa e embahador di Hulanda, a reuní representantenan di World Health Organization, ekspertonan den áreanan di preparashon pa pandemia i maneho di krisis, huntu ku representantenan di Union Europeo, Spaña, Oustralia, i ministernan i haltu funshonarionan di Hulanda, Rwanda i Kòrsou. ‘Africa Centers for Disease Control and Prevention’ tambe a partisipá den e reunion.
Durante e konversashonnan, a pone enfásis riba e situashon rondó di e brote di Ebola i e importansia di akshon i kolaborashon internashonal rápido. E partisipantenan a papia, entre otro, tokante e nesesidat pa fortifiká kolaborashon internashonal, mekanismonan sostenibel di finansamentu, invershonnan den infrastruktura di salubridat i e desaroyo kontinuo di sistemanan di preparashon ku por reakshoná di forma adekuá na futuro menasanan di salubridat.
Tambe a trata temanan manera transparensia i interkambio di informashon entre paisnan i organisashonnan internashonal, prevenshon, investigashon, tratamentu i e desaroyo i disponibilidat di bakuna.
Delegashon Hulandes a enfatisá durante e deliberashon e importansia di kolaborashon internashonal i interkambio di konosementu, spesialmente pa islanan chikí i paisnan ku kapasidat limitá den kuido di salú. Tambe a subrayá e importansia di un enfoke multilateral pa fortifiká e preparashon mundial pa e brote aktual di Ebola.
E World Health Assembly anual di World Health Organization ta reuní ministernan di Salubridat i partnernan internashonal di tur parti di mundu pa deliberá tokante asuntonan mundial di salubridat i promoshon di kolaborashon internashonal den área di salú públiko.
