Publiká riba 20 Yüli 2026
Willemstad – Despues ku resientemente a presentá e informe anual di Ombudsman, Minister di Desaroyo Sosial, Labor i Bienestar (SOAW), Charetti America-Francisca, a tuma e inisiativa pa un reunion konstruktivo. E punto sentral tabata kon ambos instansia por traha huntu pa krea solushonnan struktural pa problemanan sosial i tambe pa duna un mihó servisio na pueblo di Kòrsou.
Pa Minister America-Francisca ta importante pa no solamente tuma señalnan ku ta bini for di komunidat na serio, sino tambe pa kombertínan den mehorashonnan konkreto. Den e proseso aki, e diálogo ku institutonan independiente ku ta defendé interesnan di nos siudadanonan, ta hunga un ròl importante.
Pa e minister, e reunion aki ta un kontinuashon natural di un bon relashon di rèspèt mutuo i komunikashon habrí ku a eksistí kaba for di tempu ku el a sirbi komo Presidente di Parlamento. E ta kere ku institutonan independiente manera Ombudsman ta hunga un ròl esensial den fortalesé bon gobernashon i den protehá e interes di tur siudadano.
“Ombudsman no ta enemigu di gobièrnu, sino un partner importante. Na final di kuenta, nos ke logra e mesun meta: tin sigur ku tur hende ta wòrdu yudá bon i ku por tin konfiansa den servisio di gobièrnu ,” segun minister America-Francisca.
Durante e reunion habrí i sinsero, a sali na kla ku SOAW i e Ombudsman ta kompartí e mesun vishon riba puntonan esensial. Entre otro, a deliberá tokante un aserkamentu struktural di pobresa, trayektonan di yudansa pa personanan ku tin debe, i komunikashon efektivo entre gobièrnu i e siudadano. Tambe e problema relashoná ku awa a haña hopi atenshon. A papia tokante solushonnan struktural pa habitantenan ku ta lucha pa por paga nan debe, i tokante desaroyo di maneho nobo pa evitá mas tantu ku ta posibel, ku e servisionan básiko aki wòrdu deskonektá.
Ambos partido a enfatisá ku desafionan sosial no por wòrdu solushoná ora organisashonnan ta separá. Progreso duradero ta eksigí kolaborashon, akuerdonan transparente i un vishon kompartí pa largo plaso. P’esei, a hasi akuerdonan pa sigui fortalesé e kolaborashon entre SOAW, Ombudsman i otro partnernan ku ta komprometé. Minister America-Francisca a enfatisá ku krítika i señalnan ku ta bini di komunidat, ta fuentenan balioso di informashon ku por kontribuí na mehorashon di maneho i di servisio na komunidat.
Bon gobernashon ta eksigí transparensia, reflekshon propio i e disposishon pa tuma responsabilidat huntu. Ora nos sa di enkontrá otro, nos por nifiká mas pa e personanan ku ta konta riba nos. Esaki ta fundeshi di un bon gobernashon.
SOAW ta ekspresá su apresio pa e dialogo habrí i konstruktivo ku Ombudsman. Ambos organisashon ta komprometé nan mes na un kolaborashon duradero, kaminda e siudadano ta pará sentral i gobièrnu ta aktua di un manera aksesibel, kuidadoso i humanamente.
Minister America-Francisca a enfatisá ku e a skohe konsientemente un estilo di goberná ku ta basa riba solushonnan struktural, bon maneho i sostenibilidat. Segun e minister, e reto nan ku SOAW ta enfrentá no ta pidi promesanan popular ni reakshonnan pa gana aplouso temporal, sino desishonnan responsabel ku ta krea resultado duradero pa pueblo.
“Nos por skohe e kaminda fásil di promesanan, òf nos por skohe e kaminda di reformanan ku ta dura mas tempu pero ku ta trese benefisio real pa futuro. Mi a skohe e último. Mi kompromiso ta pa laga un ministerio mas fuerte, mas moderno i mas humano ku esun ku mi a risibí.”
