Publiká riba 03 Mei 2022
Willemstad – Minister Charles Cooper ta lamentá ku hende ku mente maligno ke hinka e komo Minister den asuntu di deal di FKP ku kasnan den área di Rif. Ku hopi repudio, Minister Charles Cooper a tuma nota di un informashon ku ta sirkulando riba retnan sosial riba asuntu di kasnan di FKP den área di RIF ku Minister su nòmber aden. Kaminda ta insinuá ku Minister Charles Cooper komo Minister ta parti di un deal, pa bende algun kas den área di RiF na Huur koop ku un kompania, i ku e kompania huntu ku e grupo Corendon lo drecha nan i buska hende pa alohamentu di e kasnan aki.
Na promé lugá, e relashon entre FKP i Gobièrnu di Kòrsou ta ankrá den un Beheersovereenkomst. I esaki ta abarká solamente kasnan di Gobièrnu. Pues kasnan ku Gobièrnu a traha i ta laga FKP manehá nan i hasi mantenshon. Esaki nan ta por ehèmpel kasnan di Brievengat, Koraalspecht, Domi, etc.
Kasnan ku ta di FKP, mes Gobièrnu lesa Minister, no tin nèt nèt nada di bisa tokante di nan. Esaki ta kasnan manera na Triangelweg, Moontjeweg, i kasnan den área di RIF, etc. Eseinan ta prerogativa di FKP pa hasi lokual ku e ta haña ta bon ku su kasnan.
Bisando esaki, ta práktikamente imposibel ku Gobièrnu òf Minister Cooper por ta parti di kualkier deal di e kasnan den área di RIF aki, ku NO ta kai bou di su responsabilidat.
Pa loke ta trata e parti den e informashon ku ta sirkulando, ku ta p’esei Minister Cooper a kore ku e direktiva di FKP, tambe ta inkorekto.
Ora ku Minister Cooper, komo Minister enkargá ku FKP, a informá e Direktiva di FKP ku e ta voornemens pa ontslag nan pa nan supervishon defisiente riba FKP su directie, nan a disidí di tuma ontslag aan blok. FKP tin hopi aña sin entregá kuentanan anual i Minister Cooper lo no tolerá esaki komo Minister enkargá.
Di e forma aki, Minister Charles Cooper ke informá komunidat lo korekto i Charles Cooper Minister di VVRP ta distansia su mes totalmente for di kualkier deal ku FKP a traha riba su kasnan ku NO ta kai bou di responsabilidat Minister Charles Cooper.
Atentamente,
Charles Cooper
Minister di VVRP
