Publiká riba 15 Sèptèmber 2023
WestJet ta oumentá frekuensia di buelo entre desèmber i aprel
WILLEMSTAD- 18 di sèptèmber 2023 – Minister Ruisandro Cijntje di Ministerio pa Desaroyo Ekonómiko ta kontentu ku e notisia alentador ku Ofisina di Turismo di Kòrsou (CTB) a publiká resientemente relashoná ku e skema di wenter di WestJet pa e periodo di 2023/2024. Esaki ta nifiká un oumento den kantidat di buelo direkto semanal pa Kòrsou, loke ta ofresé oportunidat di kresementu pa nos ekonomia i mas bida pa nos sektor di turismo.
Konforme CTB, entrante 18 di desèmber 2023 te ku 1 di aprel 2024 e buelonan entre Toronto i Kòrsou lo oumentá na 2 biaha pa siman riba djadumingu i djaluna. E buelo pa Kòrsou lo keda efektuá ku un Boeing 737 MAX ku un kapasidat di 174 stul. Minister ta mira e desaroyo aki ku un bista positivo, pasobra e ta bini komo resultado di e demanda haltu di Canada pa Kòrsou. Esaki ta un resultado positivo pa nos pais, mirando e sifranan ku CTB a publiká últimamente di desaroyo di turismo, kaminda Canada a resultá den e tòp 5 di paisnan ku a bishitá Kòrsou na luna di ougùstùs. Ademas, Minister ta kontentu ku nos komunidat tambe lo tin mas opshon di biahe pa bishitá Toronto. Loke por nifiká tambe mas konekshon i kolaborashon entre Kòrsou i Canada.
Minister Cijntje ta aploudí e kolaborashon estrecho entre WestJet i partnernan lokal: Ofisina di Turismo di Kòrsou (CTB), Curaçao Airport Partners (CAP), Curaçao Airport Holding (CAH) i Curaçao Hospitality & Tourism Association (CHATA), ku ta hasiendo esfuersonan inkansabel pa Kòrsou ta mas aksesibel pa turistanan for di Canada. Segun Minister, nos mester sigui hasi mas di e esfuersonan aki pa krea i reforsá mas aliansa ku partnernan stratégiko pa amplia e posibilidatnan pa mas biahero bishitá nos pais. E esfuersonan aki i promoshon stratégiko kontinuo pa atraé mas turista ta sigui yuda nos riba e kaminda di kresementu di e sektor di turismo, un di e pilarnan prinsipal ku ta karga nos ekonomia.
