Publiká riba 16 Aprel 2024
Willemstad- Den e siman tras di lomba Minister di Desaroyo Ekonómiko, sr. Ruisandro Cijntje, a enkabesá un delegashon ku a partisipá na Seatrade Cruise Global na Miami. Seatrade Cruise Global ta e evento krusero mas grandi na mundu, kaminda stakeholdernan ta interkambiá ku otro riba tur aspekto relevante relatá na e industria krusero. Na e evento akí, Kòrsou a uni forsa ku Aruba i Boneiru promoviendo e islanan na e industria krusero via e konsepto ABC. Huntu ku Minister Cijntje, e delegashon di Kòrsou a konsistí di gerentenan di Curaçao Ports Authority (CPA), Curaçao Tourist Board (CTB) i Havenmeester.
Ademas di kombersashonnan stratégiko ku MInister Cijntje a tene ku Minister di Turismo di Aruba, señor Oduber i Diputado di Turismo di Boneiru, señor Abraham riba e
tereno di desaroyo di turismo krusero na e islanan, Minister Cijntje i su delegashon tambe tabata tin tambe interkambio ku gerentenan di Aruba Ports Authority (APA), Aruba Tourism Authority (ATA), Bonaire Ports i Tourism Corporation Bonaire (TCB) riba e tema durante e evento. Esakinan ta den kuadro di promoshon di e programa ‘Dutch Caribbean Cruise Itinerary’ kual por sierto a wòrdu aseptá en grandi serka e liña kruseronan.
Durante Seatrade Cruise Global, Minister Cijntje i su delegashon tambe a reuní ku presidente di e asosashon krusero di Florida i Caribe (FCCA) i diferente ehekutivo di liña krusero, entre otro di Carnival Corporation, Royal Caribbean Group, Aida, Costa, Norwegian Cruise Line i Holland America Line den kuadro di desaroyo di produkto, oumento di kapasidat i volúmen solidifikándo asina e posishon di Kòrsou komo un di e mihó destinashonnan krusero den Caribe.
Pa loke a sobra di aña 2024, Kòrsou por spera di risibí aproksimadamente 300 barku krusero, ekivalente na un total di masoménos 800.000 pasahero krusero ku ta un oumento di kasi 13% kompará ku 2023. Minister Cijntje ta komprometé su mes pa sigui fortifiká e sektor krusero ku lo sigui kontribuí ku e desaroyo ekonómiko na Kòrsou.
