Publiká riba 22 Sèptèmber 2023
“Primintí ta debe!”
Willemstad, 21 di sèptèmber 2023 – Djaweps 21 di sèptèmber 2023 Minister di Desaroyo Ekonómiko Ruisandro Cijntje, huntu ku Bureau Telecommunicatie & Post (BT&P) i Curoil a lansa e trayekto di komunikashon na komunidat di Kòrsou pa loke ta trata e spesifikashonnan nobo pa kombustibel ku a keda aprobá pa Konseho di Minister dia 23 di ougùstùs último. Esaki ta un trayekto ku tantu Ministerio di Desaroyo Ekonómiko, komo BT&P, Curoil i otro stakeholdernan lo enkaminá pa informá i konsientisá komunidat durante di e periodo di transishon i e asiná yamá periodo di ‘flush out’ ku lo tuma lugá pa introdusí e kombustibel konforme e spesifikashonnan nobo.
Minister Cijntje a duna un kompilashon di e trayekto ku el a komprometé su mes na dje i liderá entrante di e momento ku el a asumí su funshon komo Minister di Desaroyo Ekonómiko pa yega na kombustibel di mihó kalidat pa Kòrsou. Esaki siguiendo e desaroyonan mundial di inflashon drástiko i skuchando e gritunan di shofùrnan di taksi, bùs i ekiponan pisá i henter komunidat kontra di subida di preis i kalidat di kombustibel. Minister a tuma e inisiativa di re-aktivá e Grupo di Trabou enkargá ku preparashon di spesifikashonnan nobo di kombustibel pa Kòrsou na yüni 2022. E Grupo di Trabou a entamá un destaho públiko pa enkaminá e investigashon riba kalidat di kombustibel na Kòrsou. Na sèptèmber 2022 via di e destaho públiko a skohe grupo SGS INSPIRE, un kompania ku kapasidat amplio, i eksperensia i konosementu den e merkado internashonal di kombustibel pa enkargá ku e tarea menshoná.
Di akuerdo ku e resultadonan di investigashon ku SGS INSPIRE a ehersé, e muestra di pòmpnan tabata konforme spesifikashonnan den e ‘Richtlijn’ establesé na 2011. Ta solamente na aña 2020 den e muestranan di SGS INSPIRE tabatin algun desviashon for di e spesifikashonan na algun pòmp di gasolin. SGS INSPIRE a duna rekomendashon pa riba término relativamente kòrtiku adaptá spesifikashonnan di tantu gasolin komo diesel i pa instituí un programa pa monitoriá e kalidat di kombustibel den henter e kadena di distribushon. Minister a gradisí i elogiá tur e stakeholdernan envolví ku a hasi posibel ku awe nos ta pará na porta pa introdusí Kòrsou su spesifikashonnan nobo tantu pa loke ta trata gasolin komo diesel. E kombustibel segun spesifikashonnan nobo (ekivalente na e norma di EURO 4) lo tin entre otro komo konsekuensia: mehorashon di efisiensia di motor dor di kombustibel di mas mihó kalidat; ménos gastu na mantenshon di motor; i redukshon di emishon di e vehíkulo, lokual ta mehorá e kalidat di aire i salú públiko. 
Promé ku sr. Curt Belfor, direktor di BT&P, a elaborá tokante di e spesifikashonnan nobo, el informá ku den Konseho di Minister di djárason 20 di sèptèmber a aprobá e tarifanan di kombustibel pa luna di òktober. Sr. Belfor a para ketu riba desaroyo di preis di kombustibel riba nivel internashonal ku a bin ta subi drástikamente i su efekto riba preis lokal di kombustibel, elektrisidat i awa pa òktober 2023. Den esaki el a indiká ku tin un oumento di 6 sèn pa liter di gasolin i un subida di 17 sèn pa loke ta trata diesel (konforme e spesifikashonnan eksistente (‘Richtlijn’ establesé na 2011)). A konsekuensia di e oumento di kombustibel (ku ta parti di e komponente di kalkulashon di preis di utilidat) i tambe e echo ku mulinanan di bientu tabata den mantenshon ku a kousa ku no tabatin e mesun produkshon di energia renovabel, por opservá tambe un subida den preis di utilidat pa luna di òktober. Despues sr. Belfor a elaborá tokante di e kalidat di kombustibel regulá a base di e spesifikashonnan nobo siguiendo e rekomendashonnan di mas importante di SGS-INSPIRE. Di akuerdo ku sr. Belfor e pasonan ku lo sigui di parti di BT&P ta suministro di informashon durante e periodo di ‘flush out’, desaroyo di e proseso di monitoreo (stakeholders) i e proseso di mantenshon di e tankinan di almasenahe i distribushon (stakeholders).
Sr. Yamil Lasten di Curoil a duna splikashon tokante di kompra di kombustibel segun spesifikashon di produkto stipulá pa Gobièrnu di Kòrsou i e proseso di ‘bidding’ pa sigurá kompra na e preis mas kumbiniente. Sr. Lasten a indiká ku e
faktura di kompra sertifiká ta keda entregá na BT&P pa kalkulashon di preis. Tambe sr. Lasten a informá ku konforme nesesidat di produkto, Curoil ya a hasi e promé kompra a base di e spesifikashon nobo. Segun sr. Lasten e produkto lo yega fin di Novèmber Kòrsou i lo ta den sirkulashon pa fin di desèmber 2023. Reakshonando riba preguntanan si Curoil lo rekompensá konsumidónan ku lo por a ser perhudiká pa motibu di kalidat di kombustibel. Tantu minister Cijntje komo Sr. Lasten a indiká ku Curoil semper a importá kombustibel di akuerdo ku e spesifikashonnan stipulá pa gobièrnu. Pero, den kaso ku un konsumidó por proba ku pa motibu di Curoil su vehíkulo a sufri daño, sr. Lasten a indiká ku tin seguronan pa esaki i ku tin un proseso ku e konsumidó por sigui, i si resultá ku Curoil tin falta, semper Curoil lo para responsabel pa esaki.
Proseso periodo di ‘flush out’
Promé ku Kòrsou pasa kompletamente pa kombustibel di akuerdo ku e spesifikashonnan nobo lo tin un periodo di ‘flush out’. Sr. Lasten a splika ku na momento ku e produkto konforme spesifikashon nobo yega, e lo bai den tanki den kual ainda lo tin e produkto di e spesifikashon anterior. Den tankinan di Curoil, tankinan di CRU i tambe tankinan di pòmpnan di gasolin, lo tin ainda algu di e produkto di e spesifikashon anterior ku lo meskla den e produkto ku spesifikashon nobo. Debí ku e produkto ta meskla ku e produkto di spesifikashon anterior, lo kuminsá e periodo di flush out. Esaki ta nifiká ku lo tarda mas òf ménos 2 luna pa e konsumidó risibí e produkto di Mogas pa 100% segun spesifikashon nobo. Pa ku Diesel esaki lo ta aproksimadamente 4 luna debí ku aki e bahada di zwavel ta mas. Sr. Lasten a duna di konosé ku Curoil ta kontinuá ku su kontròlnan di kalidat segun proseduranan vigente (3 tèst di laboratorio), ku den e rapòrt di SGS-INSPIRE a risibí un bon evaluashon. Sr. Lasten a enfatisá ku meskos ku Curoil a bini ta hasi semper, Curoil lo sigui kumpli ku tur e spesifikashonnan na momento di kompra di kombustibel, manera stipulá pa gobièrnu.
Na final di e konferensia di Prensa, Minister Cijntje a dirigí su mes na komunidat di e siguiente forma: Pueblo di Kòrsou, nos no a yega ainda, pero nos ta riba e bon kaminda! Nos ta na inisio di un era nobo kaminda nos ta introdusí spesifikashonnan nobo ku ta ofresé Kòrsou kombustibel di mihó kalidat i ku ta mas efisiente tambe. Minister a ekstendé invitashon na komunidat pa sigui e trayekto di informashon na kaminda via di e kanalnan di komunikashon di Ministerio di Desaroyo Ekonómiko i via di kanalnan di komunikashon preferí pa bo keda na altura di tur desaroyonan. Sr. Cijntje a suprayá ku un di e ophetivonan primordial den e periodo benidero ta pa restourá e konfiansa den e proseso di kompra i kalidat di kombustibel pa medio di transparensia.
Pa lesa e spesifikashonnan pa e kombustibel di un mihó kalidat, klek aki: https://bit.ly/RichtlijnenBrandstof
Pa e presentashon di e konferensha di prensa di djaweps, 21 di sèptèmber, klek aki: https://bit.ly/PresentashonKonferensha
