Publiká riba 05 Yüni 2024
Willemstad-For di 4 te ku 7 di yüni 2024, Minister di Desaroyo Ekonómiko, Ruisandro Cijntje ta na Sürnam liderando un mishon komersial di mas ku 18 empresa di vários sektor di servisio ku ta fasilitá aktividatnan den e área di energia, petroli i gas. Minister Cijntje ta invitado spesial di Minister Albert Ramdin, di Relashonnan Eksterior, ‘International Business’, i Koperashon Internashonal di Sürnam.
Minister Cijntje a inisiá su mishon na Sürnam ku un bishita di kortesia serka Minister Ramdin, kaminda a papia ampliamente tokante koperashon, negoshi i mehorá logístika entre e paisnan i asina stimulá mas negoshi. Ademas Minister Cijntje a presensiá e apertura ofisial di e Suriname Energy, Oil and Gas Summit kaminda Presidente di Sürnam Chandrikapersad Santokhi a duna un bista ekstenso di e vishon di Sürnam ku e proseso di ekstrakshon di petroli riba laman i e prosperidat ku ta premirá pa Sürnam den futuro.
E sektornan representá den e delegashon di Kòrsou na SEOGS ta servisionan finansiero, logístiko, di turismo, petrolero i gubernamental. Cinex i Ofisina di Turismo di Kòrsou a fasilitá e programa empresarial. Kòrsou ta bon posishoná pa fasilitá e servisionan finansiero ku mas di 80 aña di eksperensia. Kòrsou tin un trayektoria di mas di 100 aña di rafinahe di petroli, nos tin amplio kapasidat di almasenahe, eksperensia den logístika petrolero, nos ta fuerte den turismo, i nos ta mira kon nos tambe por benefisiá di prosperidat kaminda nos ta krese eksportashon di servisio, kupo di trabou i divisas huntu ku tur pais den nos region.
SEOGS ta un summit ku ta enserá vários konferensia i tayer, i un ekshibishon ku empresanan di rònt region ku ta suministrá produkto i servisio. Kòrsou tin un booth representativo na e ekshibishon.
Durante SEOGS minister Cijntje a partisipá tambe na e Ministerial Round Table kaminda el a elaborá huntu ku Minister Ramdin i Minister Vaughn Miller di Bahamas tokante kon bo por krea balor a traves di energia na nivel regional. Minister Ramdin a enfoká ku Sürnam ke pa henter region benefisiá di e desaroyo ku Guyana i Sürnam a trese pa region. Minister Cijntje a enfatisá riba kolaborashon i pa Karibe funshoná komo UN region i pa por tin ménos kompetensia i mas integrashon.
E titular di ekonomia lo topa tambe ku Direktor di Staatsolie, i tambe ku vários dignatario di organisashon i empresanan internashonal. Djaweps mèrdia lo tin un reunion importante ku representashon di Guyana i Kòrsou tokante oportunidatnan ku e desaroyo ‘booming’ na Guyana tin pa empresanan di Kòrsou i CINEX lo firma un MOU ku Kámara di Komersio Sürnameo i Guyanes pa fasilitá negoshi.
E programa na Sürnam ta sigui te ku djabièrnè 7 di yüni 2024. Djabierne Minister Cijntje lo regresá Kòrsou.
