Publiká riba 07 Yüni 2023
WILLEMSTAD – Bèrdat den reunion di komishon sentral di Parlamento dia 14 di mart e aña akí, Minister di Desaroyo Ekonómiko, sr. Ruisandro Cijntje, a haña masha hopi pregunta tokante e situashon di Damen Shiprepair Curaçao (DSCu) di kual mayoria lo mester ser kontestá dor di Damen i algun dor di CDM Holding N.V. (CDMH). E preguntanan a keda mandá pa e organisashonnan konserní na final di luna di aprel. Mirando e atenshon ku e astiero mester pa loke ta maneho, ku ta tuma hopi tempu i tambe nan nan ineksperensha den kontestá preguntanan di Parlamento i e echo ku nan a kontestá den idioma Hulandes e proseso aki a tuma mas tempu ku normal, ya ku mester a tradusí e kontestanan na Papiamentu. Pero entretantu ta asina leu ku Minister Cijntje lo por bini Parlamento pa duna kontesta.
P’esei pa medio di e komunikado akí, Minister Cijntje ta informá ku e lo ta bèk den Parlamento dia 6 di yüli proksimó òf si ta deseo di Parlamento for di otro siman pa duna e kontestanan di e promé tanda.
No por keda sin remarká ku hopi pregunta tin di haber ku e kontrato (konseshon) ku tin entre Damen ku ta un kompania privá i CDM Holding ku ta un kompania semi-gubernamental. Gobièrnu di Kòrsou no ta envolví direktamente komo partido.
Loke tambe ta importante pa informá ta ku despues ku Minister Cijntje a tuma un posishon fuerte kontra di Damen pa ku nan inkumplimentu te ku awor ku loke tin palabrá den e konseshon, Damen a bai bèk mesa ku CDM Holding i a kumpli i a paga tur loke nan tabatin habrí na debe. Ta asina ku Minister Cijntje a logra ku e “lease fee” a wòrdu pagá na Holding i tambe ku e “concession fee” di 2023 a wòrdu pagá den e promé lunanan. Dor di e preshon ku Minister Cijntje a pone, tambe a logra pa Damen i CDM Holding sinta na mesa pa negoshá e “concession fee” atrasá ku Damen tin habrí na CDM Holding. E negosashon ta kanando.
Banda di esaki por menshoná ku Damen a kuminsá invertí den infrastruktura di e astiero bou di supervishon di CDM Holding manera a keda palabrá. Ta intenshon ku den aña 2023 i aña 2024 Damen lo mester invertí 12.5 mion dollar den infrastruktura di e astiero. E aña aki lo invertí 1,5 mion dollar den e instalashon di elektrisidat kaminda e destaho a wòrdu hasí kaba. Tambe e parti di ingenieria pa e pòmpnan nobo pa e astiero ku ta bai wòrdu kumprá, ta keda hasí e aña akí.
E invershon den 2 kran lo tuma lugá den aña 2024. Awor akí e tambe ta den fase di ingenieria. Asina tin mas proyektonan di infrastruktura den kua lo bai invertí den aña 2024. Pa garantisá ku tur e sèn lo keda invertí den aña 2023 i aña 2024, lo hasi un audit di e invershon na final di e trayekto.
Un bon notisia tambe ta ku aktualmente Damen tin kontraktnan di reparashon ku diferente kompanianan te ku fin di òktober di 2023. Pues por bisa ku su operashon ta kanando den bon direkshon.
Mester rekòrdá ku ora ta trata di asuntunan laboral i di inspekshon na trabou, ta e Ministerio di Desaroyo Sosial, Labor i Bienestar (SOAW) ta responsabel. Hopi preguntanan di Parlamento tin di haber ku e situashon laboral. Ministerio di SOAW ta pone énfasis pa Damen buska trahadónan lokal i ta kontrolá esaki pa medio di e vakaturanan ku ta wòrdu poné riba merkado lokal pa haña yunan di tera na trabou.
Minister Cijntje i su ministerio ta sigui traha duru pa ku desaroyo di e astiero i ta keda monitoriá tur lokual ku ta kai bou di su responsabilidat. Loke por konkluí ta ku n’e momentunan akí Damen ta kumpliendo ku loke ta palabrá den e konseshon.
