Publiká riba 17 Òktober 2022
Willemstad- Manera por a tuma nota den medionan di komunikashon e último dianan, KLM a tuma e desishon pa kanselá pa un temporada e di dos buelo pa dia pa Kòrsou. Esaki ta nifiká, ku for di promé di Desèmber te ku 18 di Desèmber 2022 KLM lo operá un buelo so pa dia. Meskos tambe, e buelonan entre 9 di Yanüari te ku 31 di Mart 2023 tambe ta keda redusí na un buelo so pa dia. Esaki ta impliká, ku Kòrsou lo pèrdè 320 stul pa dia durante den e periodonan menshoná.
E desishon akí ta debí na e situashon na Schiphol kaminda e aeropuerto no tin sufisiente personal pa atendé ku e tráfiko haltu di pasahero. Esaki ta okashoná reinan largu di pasahero ku ta sali te pafó di e terminal di e aeropuerto wardando pa ‘check-in’.
E desishon di KLM pa redusí kantidat di buelonan diario ta bai tin un impakto ekonómiko negativo di riba 20 mion dòler pa Kòrsou durante di e dos periodonan menshoná.
Den kuadro di esaki, Minister Cijntje huntu ku CTB ta eksplorando alternativanan pa asina mitigá e efektonan durante di e periodo di wenter binidero. Por ehèmpel ta evaluando kiko ta e posibilidat pa amplia e kantidat di stul riba otro aerolíneanan i tambe kiko lo por hasi ku buelonan for di otro siudatnan di Oropa pa asina tòg mantené e tráfiko di turista for di Oropa pa Kòrsou riba un nivel positivo.
Kòrsou ta e destinashon na di 4 lugá for di Schiphol pa loke ta trata buelonan di distansia largu, despues di New York, Atlanta i Dubai.
