Minister di ESKD ta bishitá Skol di Fundeshi Cola Debort,

WILLEMSTAD – Den kuadro di e proyekto modernisashon di edifisionan di skol, kaminda Hulanda a pone e suma di 30.000.000 Euro disponibel, Minister di Enseñansa, Siensia, Kultura i Deporte (ESKD), Señor Sithree van Heydoorn a bishitá skol di Fundeshi Kolegio Cola Debrot na Noord Roozendal.

E skol aki lo fungi komo un skol di kambio (wisselschool) p’asina alumnonan di e skol ku ta keda mantené por hasi uzu temporalmente na Skol di Fundeshi Cola Debrot.

Minister van Heydoorn a keda risibí pa di direktiva diario di Stichting Onderhoud Scholen (SOS), lidernan i konseheronan di e proyekto i e kontratistanan ku ta ehekutando e proyekto. A duna splikashon amplio i e por a mira kiko tur a sosodé te ku e momentunan aki na Kolegio Cola Debrot.

Minister a keda impreshoná di e trabou di konstrukshon ku ta sosodé a base di un norma delantá stipulá, esta “van Heydoorn norm”, kaminda e norma pa skol di kambio(wisselschool) ta poko mas abou ku skol ku mester ser drechá pa bai keda permanente aden.

Minister van Heydoorn, den e di dos siman di yanüari lo sinta ku tur esnan envolví pa yega na un struktura definitivo pa asina e proyekto tin un struktura mas mihó i ku ta kontené tur su “Checks and Balances” nan. Minister ta spera ku proyekto di modernisashon lo ta un estímulo pa drecha nos enseñansa na bienestar di nos alumnonan na Kòrsou.

—

KOMUNIKASHON

MAS NOTISIA

Ministerio konserní: Enseñansa, Siensia, Kultura & Deporte