Publiká riba 05 Aprel 2022
Willemstad – Minister di Hustisia, Shalten Hato, ta inventarisá e kadena hudisial pa asina haña un bista amplio di tur e puntonan di preokupashon den e kadena hudisial. Riba djaluna 4 di aprel, Minister Hato a realisá un bishita di trabou na Servisio di Atmishon. E bishita tabatin komo meta pa e servisio sera konosí ku e gabinete di Minister i tambe pa elaborá riba e plannan ku e servisio tin pa e aña aki. E bishita di trabou a enserá alabes pa e gabinete komprondé di e tim di maneho di Servisio di Atmishon kiko ta e nesesidatnan di e servisio, ya asina por duna un mihó servisio na klientenan.
Aña 2022 Servisio di Atmishon ta pone hopi atenshon na halsa kalidat di servisio i pone énfasis riba komunikashon, tantu interno komo eksterno. Pa por realisá esaki, tin algún detaye ku mester atendé, manera entre otro, e falta di personal den algun departamento. Otro tema ku Minister Shalten Hato a toka durante di su bishita ta e tema di e “optimaliseringstraject”. Den e kombersashon aki tabatin espasio pa a interkambiá vishon di e gabinete i esun di e servisio, ya asina mas lihé posibel por yega na e metanan stipulá, esta halsa e kalidat di servisio i optimalisá komunikashon.
Komo parti di e metanan, no muchu tempu pasá, ya e servisio a lansa su wèpsait nobo kaminda e kliente por haña tur informashon ku ta regardá Servisio di Atmishon i e diferente produkto ku e servisio ta ofresé. Tambe e wèpsait ta ofresé e espasio pa e kliente mes traha su sita. Pronto lo por nota mas di Servisio di Atmishon riba diferente otro plataforma, manera Facebook i tambe LinkedIn.
Pa mas informashon di Servisio di Atmishon por hasi uso di e wèpsait www.immigrationcur.org.
