Minister di Hustisia ta nombra Natascha Pieter komo direktora interino di JJIC - Informashon tokante Gobièrnu di Kòrsou

Minister di Hustisia ta nombra Natascha Pieter komo direktora interino di JJIC

Hustisia
 

Minister di Hustisia ta nombra Natascha Pieter komo direktora interino di JJIC

Publiká riba 02 Yüni 2026

Minister di Hustisia, mr. Shalten Hato a nombra señora Natascha Pieter komo direktora interino di Justitiële Jeugdinrichting Curaçao (JJIC).

Ku e nombramentu aki, un siguiente paso importante ta wòrdu duna den e proseso di stabilisashon, profeshonalisashon i desaroyo kontinuo di e institushon. E minister tin konfiansa ku señora Pieter, huntu ku e empleadonan di JJIC, mayornan, partnernan den kadena di hustisia i tur otro personanan enbolbí, lo kontribuí di manera importante na realisashon di un ambiente sigur, strukturá i orientá riba desaroyo pa e hóbennan ku ta bou di kuido di e institushon.

Señora Pieter tin mas ku trinta aña di eksperensia den sektor hudisial tantu na Hulanda komo na Kòrsou. Durante su karera, el a akumulá hopi eksperensia den guia, liderazgo, desaroyo den organisashonnan i proseso di kambio. E ta rekonosí komo un profeshonal orientá na solushon, ku sa krea konekshon entre hende, disiplinanan i organisashonnan, i ku tin e abilidat pa uni diferente interesnan rondó di un meta komun. Komo un persona ku sa traha na konektá diferente partinan, el a kolaborá ku éksito ku diferente instansianan gubernamental, organisashonnan sosial i partnernan den kuido. Su estilo di liderazgo ta karakterisá pa kompromiso, klaridat, kolaborashon i fortalesé e profeshonalnan den nan trabou diario.

Ademas, el a desempeñá un papel importante komo liaison officer den e implementashon di e modelo sosiológiko di Glen Mills School, un modelo ku ta basá riba dinámika di grupo positivo, kambio di komportashon, responsabilidat i e prinsipio di stimulá hóbennan pa mira nan posibilidatnan en bes di nan limitashonnan. Tambe, señora Pieter tin un historia amplio komo agente di kambio den diferente trayektonan di transformashon den gobièrnu, kaminda el a guia organisashonnan den proseso di kambio di kultura, mehorashon di kalidat i fortalesé nan servisio. Ademas, e ta aktivo komo trainer pa supervisornan di Kódigo di Protekshon, kaminda el ta sostené dirigente i supervisor nan den rekonosé, prevení i atendé situashonnan relashoná ku protekshon di mucha, hóben, persona mayor i personanan den relashonnan vulnerabel.

Den su funshon komo direktora interino, señora Pieter lo enfoká riba fortalesé e sosten ku ta wòrdu duna na e hóbennan, nan mayornan i kuidadónan, manera tambe na e empleadonan di e institushon. Den e proseso ei, el lo implementá e línea di maneho stipulá pa Minister di Hustisia i kontribuí na ehekushon di e rekomendashonnan ku ta resultá for di e trayekto di mehorashon ku awor ta kore bou guia di SOAB.

E minister ta enfatisá ku JJIC mester ta mas ku solamente un institushon será.

“JJIC mester ta un lugá kaminda hóbennan no solamente ta protehá kontra un mas grandi desaroyo negativo, sino tambe kaminda nan ta prepará pa un mihó futuro. Un lugá kaminda struktura, guia, edukashon, responsabilidat i perspektiva ta sentral. Siguridat ta keda esensial, pero siguridat so no ta sufisiente. Hóbennan mester haña e oportunidat pa desaroyá nan mes di nobo i kontribuí positivamente na nos komunidat.”

Segun e minister, e nombramentu di señora Pieter ta kuadra perfektamente ku e vishon aki.

“Ku señora Pieter nos ta atraé un profeshonal eksperensia ku ta disponé di e konosementu, eksperensia i enfoke humano ku ta nesesario pa sigui duna forma na e kambionan ku a ser inisiá den JJIC. Su eksperensia tantu na Kòrsou komo na Hulanda, su konosementu di proseso di kambio i su abilidat pa konektá hende ku otro ta hasi dje partikularmente apto pa asumí e responsabilidat importante aki.”

Ministerio di Hustisia ta ekspresá su apresio pa e dedikashon di tur empleadonan di JJIC durante e periodo pasá i ta mira ku interes pa sigui traha huntu ku tur partnernan envolví pa konstruí un institushon sigur, stabil i orientá riba futuro. E esfuerso ta keda enfoká sin disminushon riba un meta komun: krea un ambiente kaminda hóbennan por rekuperá, krese, siña asumí responsabilidat i haña di nobo perspektiva pa un regreso eksitoso den sosiedat.