Publiká riba 04 Mei 2026
Willemstad – Riba dia di Obrero e dia a kuminsá ku un Santu Sakrifisio di misa na Parokia Santa Famia, kaminda reflekshon spiritual i diálogo sosial a forma e base di e selebrashon. Durante e misa pastor Curtis Meris a kompartí un mensahe inspirativo, spesialmente dirigí na nos hóbennan, ku un yamada pa no solamente skohe un trabou, sino skohe un vokashon ku ta konektá ku nan propósito den bida.
Den su diskurso, Minister di Ministerio di Desaroyo Sosial, Labor i Bienestar (SOAW), Charetti America, a pone énfasis riba e balor esensial di trabou den nos sosiedat. El a enfatisá ku e obrero ta e pilar di desaroyo di Kòrsou, i ku sin e kontribushon diario di trahadonan, no tin ekonomia, no tin kuido, ni progreso pa nos pais.
Minister a rekonosé ku pobresa ta un realidat ku ta pidi akshon serio, pero a indiká ku solushon duradero no ta bini solamente for di asistensia sosial. El a subrayá ku pa eliminá pobresa di bèrdat, nos mester bai na e rais, kaminda oportunidat, edukashon i trabou ta hunga un ròl sentral.
Den e kuadro aki, Minister a pone enfoke fuerte riba e nifikashon di trabou komo instrumento di transformashon. Trabou, segun su mensahe, ta mas ku un medio pa gana un salario. Trabou ta duna hende e poder pa para riba su pia, pa proveé pa su famia i pa rekonosé su balor propio. Di e forma aki trabou digno ta restourá dignidat humano i ta forma e base pa un sosiedat mas fuerte.
Tambe Minister a mustra ku pobresa no ta solamente material, sino por tin un defisiensia mental, kaminda hende ta pèrdè fe den nan mes. Den e konteksto aki trabou digno ta bira un instrumento ku ta yuda hende pasa di dependensia pa propósito, i asina kontribuí na progreso real den sosiedat.
Durante e programa, representante di sindikatonan, entre otro señor Frensley Sillé i señor Adri Williams, a ekspresá nan preokupashonnan tokante posishon di trahadó. Minister a skucha ku atenshon i a reafirmá su kompromiso pa sigui ku diálogo struktural.
Na final di su diskurso, Minister a enfatisá:
“Un kos ta sigur: mi a skucha boso i mi ta konvensí ku diálogo ku boso ta esensial. P’esei mi ke enfatisá:
E proseso tripartit entre gobièrnu, sindikatonan i VBC lo sigui. Mi ta asumí mi ròl komo esun ku tin ku organisá esaki na serio. Huntu ku Minister Presidente, nos ta guiando e proseso aki pa garantisá ku e diálogo ta struktural i produktivo.
Siman pasá, nos a tuma pasonan importante pa fasilitá e proseso. Durante luna aki, nos lo sintá huntu pa trata tur e puntonan ku ta importante pa boso.
Mi ta kere den un kos: solushon, i huntu nos por alkansá esaki.”
Ku esaki, gobièrnu di Kòrsou ta mustra su kompromiso pa traha huntu ku tur ‘stakeholder’ pa logra un merkado laboral mas hustu, inklusivo i sostenibel pa Kòrsou.
