Minister enkargá ku enseñansa ta lesa pa alumnonan. - Informashon tokante Gobièrnu di Kòrsou

Minister enkargá ku enseñansa ta lesa pa alumnonan.

Enseñansa, Siensia, Kultura & Deporte
 

Minister enkargá ku enseñansa ta lesa pa alumnonan.

Publiká riba 31 Òktober 2024

WILLEMSTAD – Durante di e siman di Ban lesa Minister di Enseñansa, Siensia, Kultura i Deporte (ESKD) sr. Sithree van Heydoorn ta lesa pa alumnonan di skol di fundeshi Kolegio San Dominico na Montaña Rei. E skol a invitá Minister pa bin selebrá e bunita dia awe kaminda nan ta selebrá kada dia den e tema di: ‘’Est’un Kabesura’- Lekker Eigenwijs”.

Durante di siman skol di fundeshi Kolegio San Dominco a tene vários aktividat kaminda alumnonan por a bin ku nan material di skol pero sin tas, nan a bin skol sin sapatu i awe nan tabata tin un dia ku nan tin mag di hasi un lokura/kabesura ku nan kabei. Minister Sithree van Heydoorn a lesa un kuenta di kompa Nanzi pa e muchanan kaminda e mensahe tabata ku, ora bo hasi malu; malu ta bin pa bo i ora bo hasi bon; bon ta bin pa bo. Tabata un mainta hopi dushi kaminda minister a konektá ku e alumno i dosentenan. Na mes momentu ta felisitá i yama danki na e skol di fundeshi Kolegio San Dominco ku e tremendo selebrashon i dushi ambiente.

Minister enkargá ku enseñansa sr. Sithree van Heydoorn ta sumamente kontentu ku e Siman di Ban lesa paso esaki ta stimulá desaroyo di nos muchanan. Paso ku lesamentu nos ta amplia nos konosementu, ku lesamentu nos ta konosé mundu, ku lesamentu nos ta desaroyá nos mente i ku lesamentu nos ta stimulá nos kreatividat. P’esei ministerio di ESKD ta stimulá pa sigui lesa i krusa frontera di sabiduria i konosementu. A la bes ministerio ta yama Biblioteka Nashonal Kòrsou pabien i danki pa karga e siman aki.

*Riba potrètnan athunto por tuma nota di e mainta na skol di Fundeshi Kolegio San Dominco

—
KOMUNIKASHON