Publiká riba 20 Yüli 2022
WILLEMSTAD – Minister di Hustisia e entregá dia 5 di yüli último algun pin di ‘E bon Yu di Kòrsou’ na empleadonan di Justitiële Jeugd Inrichting Curaçao (JJIC), ántes GOG, pa e trabou inkansabel ku nan ta hasi tur dia. Esaki spesífikamente durante e periodo di COVID-19 i e preparashonnan pa último menasa pa tormenta tropikal.
Apesar di e situashonnan krítiko, e personal a sigui bai trabou pa duna guia na e hóbennan den e instituto. Durante tur e añanan ku e trahadónan ta ehersé e trabou, ta bisto ku ta hasi esaki ku amor i dedikashon, mientras ta pone e hóben na promé lugá. Mirando esaki, minister a haña na su lugá pa duna kada un trahadó un muestra di su gratitut ku un pin di ‘E Bon Yu di Kòrsou’.
