Publiká riba 20 Aprel 2022
WILLEMSTAD – Minister di Hustisia sr. Shalten Hato a realisá un bishita na servisio di Brantwer. Durante e bishita a duna un indikashon na e minister di e situashon delikado bou di kual Brantwer ta funshonando i e motibu agudo pa kual mester reforsá e personal na servisio di Brantwer.
Minister Hato a tuma nota di e krítika kontinuo ku tin den komunidat pa loke ta trata e servisio i tambe ekiponan na disposishon di Brantwer. Komo minister di Hustisia, minister Hato ta responsabel pa seguridat di pais. Brantwer Kòrsou ta un di e organisashonnan ku ta forma parti di e kadena hudisial, pues ku mester aportá na seguridat di nos pais.
Brantwer Kòrsou t’ei pa yuda skapa hende i bestia den situashonnan di peliger, prevení i minimalisá e chèns ku kandela ta ekspandé, limitá peliger di kandela i tambe prevení i limitá aksidente na un kandela. Pa kumpli ku e trabounan ankrá den e lei ku ta regardá seguridat di estado, Brantwer Kòrsou ta duna konsehonan preventivo na un manera profeshonal i duna asistensia na pueblo di Kòrsou durante kandela i/òf insidentenan den tempu di nesesidat, entre otro kalamidat i emergensha, Brantwer ta hasi esaki ku hopi dedikashon i perserveransha.
Pa Brantwer Kòrsou por kumpli ku su responsabilidat i asina aportá den seguridat di nos país, Konseho di miniser a bai di akuerdo pa reforsá Brantwer dor di habri 25 vakatura. Trahadónan di Brantwer Kòrsou, for di dia di e bishita ku minister Hato a realisá a ekspresá nan satisfakshon ku porfin nan ta hañando e atenshon nesesario pa asina nan por kumpli ku nan debernan diario.
