Publiká riba 04 Febrüari 2022
WILLEMSTAD – Minister Larmonie-Cecilia tabata tei presente djaweps último na ‘site inspection’ di hotèl Sandals huntu ku demas kolega minister. Tabata un mainta kaminda Gobièrnu di Kòrsou a risibí informashon rondó di desaroyonan di Sandals na Kòrsou i alabes por a mira trabounan di konstrukshon ku a keda ehersé.
Komo minister di labor, un punto di atenshon ku sigur Minister Larmonie-Ceclia ta bai atendé den transkurso di e siman binidero ta e punto kaminda Sandals ketu bai ta buskando mas empleado sin por alkansá e kantidat deseá. Mirando ku riba 14 di aprel 2022 Sandals lo habri su portanan i mester tin tur empleado prepará pa e fecha akí, e situashon sigur ta di karakter urgente.
Minister Larmonie-Cecilia i Sandals su deseo ta pa nos yunan di Kòrsou yena e 450 kuponan di trabou pendiente. Pa e motibu akí minister a reuní djabièrnè 4 di febrüari ku Sandals pa asina huntu yega na un plan pa atendé e punto akí. Minister ta konvensí ku tin oportunidat di trabou i posibilidat pa tur ku ta buskando. Pueblo di Kòrsou ta keda invitá pa keda pendiente e siman binidero pa mas desaroyo riba e punto akí for di Ministerio di Desaroyo Sosial, Labor i Bienestar.
