Publiká riba 08 Mart 2022
Willemstad – Uniendo su mes ku e tema di dia internashonal di hende muhé, Minister Larmonie-Cecilia su mensahe na komunidat ta ”Kibra ku prehuisio i kosechá fruta mañan”.
Dia internashonal di hende muhé a sali for di e movementu laboral den Estadonan Uní i awe ta un evento konmemorativo anual rekonosé pa Nashonnan Uni. E simia a keda plantá na kuminsamentu di 1900 na momentu ku 15 mil hende muhé a marcha den kayanan di New York eksigiendo oranan di trabou mas kòrtiku, mihó pago i derecho di voto. Tabata e partido sosialista di Merka ku a deklará e promé dia Nashonal di hende muhé.
Ku su orígen internashonal, Kòrsou tambe ta konmemorá, paso aki tambe e hende muhé a lucha kontra abusu, kontra maltrato, kontra diskriminashon i pa rekonosementu, rèspèt, igualdat i derecho pa e tin un bida digno. Su lucha ta sigui. Na Kòrsou e lucha di nos damanan a manifestá su mes primordialmente bou di dosentenan femenino, ku no tabata risibí pago igual ku e dosente maskulino. Nan no tabatin derecho di tin propiedat própio i tabata víktima di diskriminashon laboral, alegando ku nan no por a ehersé sierto funshonnan.
Den transkurso di tempu nos damanan na Kòrsou a risibí derecho i trato igual den lei pero tambe nan a kuminsá risibí e rèspèt ku tur hende muhé meresé. Ainda tin asuntu pa mehorá. Mucha, mayor i nos hòmbernan no mester lubidá ku nos damanan ta nos mama, nos kompañera, nos kasá, nos ruman, nos prima, nos wela i riba nivel profeshonal e mes por ta nos zùster, nos dòkter, nos dosente, nos abogado, nos koredó di bùs, nos hefe di trabou, nos polis, i te asta nos presidente di pais.
Tur aña Nashonnan Uni ta bini ku un tema ligá na Dia Internashonal di hende muhé. Dia 8 di mart 2022 e tema ta “Gender equality today for a sustainable tomorrow”, esta igualdat di género awe pa un mañan sosteníbel.
Kòrsou ta boga pa mañan e tin un futuro muchu mas sosteníbel. E ta deseá un futuro kaminda tin mas produkshon lokal di kuminda, mas uso di energia bèrdè, un futuro kaminda tin un desaroyo ekonómiko duradero, ku mas hende na trabou, i den un medio ambiente limpi.
Riba dia internashonal di hende muhé, laga nos tur refleshoná riba e echo ku si nos ekskluí hende muhé, menospresiá su balor den komunidat, den trabounan manera agrikultura, energia bèrdè, outomatisashon, e deseonan lo tarda pa bira realidat òf nunka nos ambishonnan lo bira realidat.
Minister Larmonie-Cecilia ta bisa: “Mi ke enkurashá tur hende, hòmber i muhé, pa ta solidario ku otro, sostené otro, pa huntu eliminá e situashon di desigualdat eksistente. Esaki sin duda algun ta e forsa pa kambio duradero.
FELIS DIA INTERNASHONAL DI HENDE MUHÉ!
