Publiká riba 30 Mei 2023
WILLEMSTAD – Ministerio di Gobernashon, Planifikashon i Servisio Públiko a entregá su proposishon pa presupuesto 2024 pa drenta den e proseso di evaluashon i aprobashon. Banda di tene kuenta ku tareanan general, di servisio públiko i tareanan stipulá den lei, e proposishon di presupuesto ta tene kuenta tambe ku tareanan/proyektonan ku ta forma parti di e Programa di Gobernashon 2021-2025 i e agènda di ehekushon di e asina yamá “Landspakket”. Minister Martina a indiká kua fondonan ta nesesario durante e periodo di mas aña (2024-2027) pa ehekutá e tarea- i proyektonan akí.
Tin diferente reforma pa kual ya kaba preparashonnan pa ehekushon a kuminsá. Un di nan ta reforma di e aparato gubernamental. Nos aparato gubernamental mester keda kombertí den un aparato ku ta efektivo, efisiente, desisivo i ku forsa di ehekushon. Por logra esaki entre otro pa medio di digitalisashon hasiendo mas ku ménos hende. VVU a redusí e aparato gubernamental ku mas òf ménos 600 persona i awor mester invertí durante un periodo di mas aña pa asina logra e reformanan rekerí.
Minister Martina ta indiká ku pa logra e reformanan ku éksito ta importante ku ta garantisá disponibilidat di sufisiente fondo pa un periodo di mas aña, asina tin kontinuidat den e reformanan. E proposishon pa e presupuesto 2024 ta brinda un bon base pa esaki.
