Minister Middelhof: 30 dia pa tur establesimentu tin nan pèrmitnan na òrdu - Informashon tokante Gobièrnu di Kòrsou

Minister Middelhof: 30 dia pa tur establesimentu tin nan pèrmitnan na òrdu

Desaroyo Ekonómiko
 

Minister Middelhof: 30 dia pa tur establesimentu tin nan pèrmitnan na òrdu

Publiká riba 16 Òktober 2025

WILLEMSTAD – Durante un rueda di prensa 16 di òktober, Minister di Desaroyo Ekonómiko, Roderick Middelhof, a duna di konosé ku tur kompania i establesimentu di horeca lo tin 30 dia pa kontrolá i regla tur nan pèrmitnan.

Minister Middelhof a enfatisá ku e periodo aki ta destiná pa duna empresarionan e oportunidat pa regla nan asuntunan korektamente, pero tambe ku despues di e periodo aki lo tin sero toleransia pa kompanianan ku ta sigui operá sin pèrmit bálido. Tur persona mester kòrda bai tuma nan pèrmitnan i tene na kuenta ku nan mester tin nan pèrmitnan original! 

“Meskos ku mester paga seguro i number di auto, mester pidi pèrmit di horeca tambe,” Minister Middelhof a bisa. “E reglanan aki no ta eksistí pa restringí, pero pa protehá, pa garantisá ku tur negoshi por operá na un manera sigur i hustu i ku konsumidónan tin konfiansa den nos merkado.”

Minister Middelhof a indiká ku e aña ta kabando i ku esaki ta un periodo importante pa hopi empresario. “Tur hende kier un fin di aña eksitoso, pero esey ta kuminsa ku responsabilidat. Perkura pa bo pèrmitnan ta na òrdu, pa bo por sigui hasi negoshi sin molester.”

Tim di inspekshon di Ministerio di Desaroyo Ekonómiko lo kontrolá aktivamente si tur kompania ta kumpli ku e reglanan. Kompanianan ku no tin nan asuntonan na òrdu ta kore e riesgo di sanshon.