Publiká riba 10 Febrüari 2026
WILLEMSTAD – djamars 10 di febrüari 2026 a tuma lugá un enkuentro orientativo entre Royal Schiphol Group i Minister di Desaroyo Ekonómiko, sr. Roderick Middelhof, ku partisipashon di Curaçao Airport Holding (CAH). E enkuentro a tuma lugá den un esfera ameno, ku enfoke riba diálogo i interkambio di informashon.
For di parti di Royal Schiphol Group tabata presente sr. Kjell Kloosterziel, Director Schiphol International / Director Strategy & Airport Planning, i sr. Rob van Buuren, International Business Development Manager. Curaçao Airport Holding (CAH) tabata representá dor di sr. Wilhelmus Ignacio, Managing Director, sra. Priscilla Duin-Circkens, Chief Strategy Officer & Assistant to the Director,I sra. Iris Prinsen, Airport supervision manager.
E enkuentro tabata di karakter di sera konosí, kaminda Royal Schiphol Group a duna un splikashon general tokante kon e organisashon ta funshoná, nan eksperensia internashonal i nan kooperashonnan ku diferente aeropuertonan na mundu. Den e diálogo a wòrdu enfatisá e importansia di siña di otro, fortalesé relashonnan i eksplorá kon partidonan por komplementá otro riba nivel di konosementu i eksperensha.
Minister Middelhof a kompartí bista tokante e desaroyo ekonómiko di Kòrsou, indikando ku sektor di turismo ta mustra kresementu, i ku e kantidat di pasaheronan ku ta hasi uzo di Aeropuerto Internashonal di Kòrsou ta sigui aumentando. Den e kuadro ei, el a señalá e nesesidat pa pensa riba un aeropuerto mas grandi, ku atenshon speshal pa ekspanshon, kalidat di servisio i fortalesementu di e área di carga (cargo), komo parti di e potensial ekonómiko di nos isla.
E enkuentro ta wòrdu konsiderá komo un paso informativo den e diálogo kontinuo ku a kuminsá añanan pasá, i a sirbi pa interkambiá informashon i profundisá e bista riba e ròl strategíko di e aeropuerto den e vishon di Gobièrnu di Kòrsou pa futuro.

Riba potrèt di man robes pa man drechi:
sr. Kjell Kloosterziel (Royal Schiphol Group), Minister Roderick Middelhof (Ministerio di Desaroyo Ekonómiko) i sr. Rob van Buuren (Royal Schiphol Group).
Enkuentro Royal Schiphol Group ku Minister Middelhof 10 feb 2026