Publiká riba 30 Ougùstùs 2023
Minister van Heydoorn, ta oumentá tarifa di e sistema di finansiamentu di enseñansaSektor di Enseñansa i Siensia a kuminsá ku un trayekto di revishon di e struktura di finansiamentu (Beskostigingsstelsel V&V) ku e meta pa por tin un struktura nobo den aña eskolar 2025/2026. Na e momentu aki Stichting Overheidsaccount Bureau (SOAB) ta finalisando e trayekto di inventarisashon di tur e komponentenan di e struktura aktual di finansiamentu. For di komienso di aña i paralelo na e trayekto ariba menshoná, Minister van Heydoorn a instruí sektor di Enseñansa i Siensia pa buska un solushon temporal pa e tarifanan di limpiesa, gastu di utilidat (koriente i awa), pero tambe gastunan pa e studiantenan por disponé di mas i mihó material pa edukashon.
Mientras tantu Ministerio di ESKD a evaluá e sistema aktual di finansiamentu segun e nesesidat indiká i a yega na un oumento konforme e límite i posibilidatnan den e presupuesto di pais Kòrsou pa aña 2023/2024. Komo resultado di e investigashon menshoná, Minister di ESKD a informá direktiva di skolnan pa medio di un karta, ku ta bai ahustá algun tarifa den e sistema di finansiamentu (V&V) pa e aña eskolar aktual 2023/2024. E ahuste aki ta un oumento struktural di 3.2 mion florin pa aña.
E ahuste ta konforme e tabla ku ta sigui;
| # | Tarifa | E Tarifa ta subi ku |
| 1 | Mantenshon lokalidat i tereno di skolnan (Onderhoud gebouwen e terreinen) | 35% |
| 2 | Gastunan di Limpiesa
(Schoonmaakkosten) |
16.6% |
| 3 | Utilidat pa ku uzo di Elektrisidat
(Electra) |
27.6% |
| 4 | Utilidat pa ku uzo di Awa
(Water) |
15.2% |
| 5 | Medionan di Instrukshon (leermiddelen voor FO en SFO) | 65% |
| 6 | Gastunan Administrativo
(BBA waaronder administratiekosten) |
20% |
Sektor di Enseñansa i Siensia riba instrukshon di Minister ta trahando riba un proposishon pa kubri e gastunan di, ‘leerling volgsysteem’ (LVS). Tambe ta evaluando ahuste di gastunan di limpiesa di e periodo di yanüari te ku yüli 2023, ora e proposishon aki ta kla, esaki lo keda evaluá i lo indeksá esaki te ku 1 yanüari 2023. E adaptashon di algun tarifa di e sistema di finansiamentu (Beskostigingsstelsel V&V) aki ta tuma lugá despues di mas ku 22 aña, ku no a ahustá e tarifanan aki. E adaptashon aki lo mester kontribuí na un ambiente di trabou mas mihó i tambe na bienestar di nos hóben studiantenan.
Pronto Minister van Heydoorn lo duna mas informashon relashoná ku e tema aki.
—
