Publiká riba 11 Mart 2023
WILLEMSTAD/KRALENDIJK- Minister di Enseñansa, Siensia, Kultura i Deporte (ESKD) sr. Sithree van Heydoorn i un delegashon ta na Bonieru riba invitashon di INDEBON pa e Weganan Eskolar Interinsular ku ta tuma lugá dianan 10, 11 i 12 mart 2023 na Boneiru.
Minister a hasi uso di e oportunidat pa bishitá Cocari (zorg en welzijn groep), na Rincon kaminda grandinan di e bario ta sosialisá durante di dia. Minister a keda risibí ku hopi alegria. Tambe nan a duna un rekorido kòrtiku i e grandinan a hasi un invitashon personal na minister pa regresá riba dia di Rincon. E proyekto aki ta keda supsidia direktamenta pa Hulanda.
Direktor di Sektor di Kultura i Deporte sra. L.Sambo-Velder ku ta forma parti di e delegashon a tene un kombersashon di gran balor ku Hefe di Edukashon i Bienestar sr. Timoteo Silberie. Kaminda a elaborá riba temanan enkomun manera kultura, biblioteka, deporte i mas. A yega na palabrashon ku ta bai traha riba un akuerdo pa traha huntu riba e temanan ku ta uní nos manera idioma, historia i herensia kultural. Otro kombersashon ku a keda tené ta ku Lider di proyekto di e organisashon BES(t) 4 KIDS sra. Tamara Nicolaas. A dialogá i deliberá riba informashon pa ku e aktividatnan pre-eskolar na Boneiru. Sra. Nicolaas a duna un presentashon di e struktura di nan organisashon i e regulashon pa ku sentronan pre-eskolar na Boneiru.
Na e apertura di e weganan Eskolar Interinsular kaminda Minister S. van Heydoorn a tene diskurso i a hasi entrega di un apresio na kada un di e paisnan. Tambe minister a presensiá e desfile di tur e atletanan di tur e paisnan pa ku e ramo di deporte di dam i ahadres. Durante di e dianan Minister i su delegashon ta partisipá i animá e delegashon di nos hóbennan ku ta partisipá na e kompetensianan di dam i ahedres.
** riba e potrètnan athunto por tuma nota di bishita na Cocari i komberashon ku sr. T.Silberie i sra. T. Nicolaas, apertura di e weganan eskolar interinsula huntu ku Gezaghebber interino sr. N.Oleana, Diputado enkargá ku deporte sr.J.Kroon, presidente di Parlamento di Aruba sr. E.Vrolijk i vários dignatario mas di Boneiru.
**Pa mas potrèt por bishitá e página di facebook di Ministerio: Bishita na Boneiru.
—
KOMUNIKASHON
