Ministerio di ESKD ta firma akuerdo ku UWF

 

WILLEMSTAD –Ministerio di Enseñansa, Siensia, Kultura i Deporte (ESKD) den estrecho koperashon ku Stichting Studie Financiering (SSC) ta traha i krea mas oportunidat pa nos studiantenan por sigui nan karera profeshonal na Ustados Unidos. Minister Sithree van Heydoorn den representashon di Ministerio di ESKD ta firma un akuerdo ku University of West Florida(UWF).

Minister di Enseñansa, Siensia , Kultura i Deporte ta riba un mishon na estado di Florida. E mishon aki ta pa realisá finansiamentu di estudio pa nos studiantenan na un preis mas faborabel. Di manera ku ora nos studiantenan kaba nan studio nan lo no tin un debe astronómiko.

Meta prinsipal di e mishon aki ta;

1. Negoshá finansiamentu di studio na un preis rasonabel;
2. Krea e posibilidat pa e studiantenan por studia mas serka di kas i evitá e shòk kultural;
3. Studiando den e region ta amplia e posibilidat pa nos studiantenan regresá nan pais bèk despues di finalisá nan estudio i aportá asina na desaroyo i ekonomia di nos dushi Kòrsou.

Djaluna 5 di yüni, Minister sr. Sithree van Heydoorn a sera un akuerdo ku “University of West Florida” (UWF) na Pensacola Florida. Ku e akuerdo aki, nos studiantenan entrante aña eskolar 2023/2024 por risibí “Instate Tuition “, ku ta nifiká ku nos studiantenan ta paga e mesun suma pa nan estudio ku un studiante Merikano. Presente na e firmamentu aki di parti di UWF tabata presente, Dr. Martha Saunders presidente i Dr. Gregory Tomso vise-presidente di asuntunan akadémiko di studiantenan. Minister van Heydoorn a hiba kombersashon tambe ku Direktor di e departamentu ku ta atendé ku asuntunan internashonal pa UWF, señora Rachel Hendrix. Despues un studiante yu di Kòrsou a guia e delegashon di Minister van Heydoorn i tene un rekorido den e diferente área i edifisionan di UWF.
—
Komunikashon
* riba e fotonan ariba por tuma nota di momento ku a firma e akuerdo i tambe rekorido den e institushon universitario (UWF) na Florida i pa mas potrèt por bishitá página sosial di Ministerio.

** riba e fotonan por tuma nota di e akuerdo firmá ku UWF: