Publiká riba 04 Mart 2022
Willemstad – Resientemente kabinete di Minister di GMN dr. Dorothy Pietersz-Janga a hasi un rekorido i bishitá diferente kunukero aki na Kòrsou. Meta di e rekorido tabata pa skucha di e kunukeronan mes kiko ta e retonan ku nan ta keda konfrontá kuné pa produsí nan produktonan. Minister di GMN dr. Dorothy Pietersz-Janga mes no tabata presente, pero a keda remplasá pa hefe di su kabinete mr. Vanessa Elisa. Huntu ku kabinete di minister tambe tabatei presente Sekretario General di GMN drs. Sharlon Melfor, direktor di sektor di agrikultura Gabriel Murray Msc i kuater kolaboradó di AVB.
Kòrsou tin agrikultornan ku ta hasi uzo di e téknikanan di mas moderno pa produsí bèrdura sin hasi uzo di tera i tiki awa. Kòrsou tin kunukeronan tambe ku bastante área di kultivo ku produkshon basta grandi di entre otro tomati, peterseli i kòmkòmber. Un di e puntonan di atenshon mas importante ku kunukeronan ta menshoná ta ku mester tin un mihó kordinashon entre produkshon lokal i importashon. E falta di kordinashon aki ta pone ku regularmente kunukeronan mester tira hopi produkshon afó.
Ministerio di GMN ta bai evaluá tur e puntonan di atenshon pa trese alivio pa e sektor.
