Publiká riba 05 Òktober 2023
WILLEMSTAD – Djaweps 5 di òktober Minister Ruisandro Cijntje di Desaroyo Ekonómiko huntu ku Minister di Tráfiko, Transporte i Planifikashon Urbano, señor Charles Cooper, a hasi apertura ofisial 
di Plasa di Arte Kòrsou den presensia di funshonarionan di VVRP, MEO, CTB, Fundashon Marshe, Renaissance, bendedónan di artesania, artistanan i e públiko presente. Minister Cijntje ta sumamente orguyoso di mira kon e Plan pa Marshenan den Sentro di Siudat ta hañando su forma i birando realidat. Na e okashon aki e énfasis ta riba e zona pa benta di artesania, Plasa di Arte Kòrsou, situá entre Renaissance Hotel i Megapier, ku tin e meta pa nos por promové produktonan lokal i produktonan ku ta representá nos pais i nos kultura. Minister a informá ku ta e intenshon pa via CTB merkadeá e sitio aki pa turistanan ku ta keda den hotèl tambe por bin bishitá e sitio.
Minister Cijntje den su diskurso a ekspresá su gratitut na un i tur ku tabatei presente na e apertura di e Plasa di Arte Kòrsou. Sr. Cijntje a felisitá CTB pa e tremendo ehekushon di e proyekto aki i alabes a yama un bon biní na kada empresario ku lo forma parti di e Plasa di Arte Kòrsou. Minister a deseá kada un di e empresarionan tur klase di éksito ku 
nan plannan pa futuro i a indiká ku e empresarionan por konta riba su ministerio pa por asistí nan kaminda por i ku tin oído pa skucha kada empresario.
Realisashon di Plasa di Arte Kòrsou ta forma parti di e Plan pa Marshenan den Sentro di Siudat, aprobá pa Konseho di Minister. E propósito primordial di e plan aki tabata pa restrukturá i re-organisá e marshenan den nos sentro di siudat, pa trese òf rebibá funshonnan ku ta trese bida den sentro di siudat. Pa loke ta trata bendedónan di artesania, dor di agrupá nan huntu na un sitio, ta pèrkurá pa un bista mas ordená den nos sentro di siudat, bendedónan ta haña oportunidat igual pa bende nan produktonan, i tambe pa fasilitá e aspekto di kontrol i merkadeo. Segun e plan aki e 
área di Fuik/Awasá kaminda e bendedónan di artesania na Otrobanda tabata pará te ku aworakí, lo mester bira un área kaminda hende por sinta disfrutá di e bista impreshonante riba Handelskade i Fort Amsterdam. Na e sitio aki lo tin solamente ‘standplaats’ pa artistanan ku ta toka, pinta, ets., miéntras lo komplementá e área aki ku dos ‘standplaats’ pa kos di kome/bebe lokal.
Fundashon Marshe ta e organisashon ku gobièrnu a enkargá pa mantenshon di tur edifisio i konstrukshon di marshenan den sentro di siudat, inkluyendo e stèntnan na Plasa di Arte Kòrsou aki. Banda di esei, Fundashon Marshe ta supervisá e bendedónan pa sigurá ku nan ta kumpli ku e kondishonnan den nan pèrmit, i ta guia nan pa nan por sigui mehorá i krese komo empresario ku e intenshon ku despues di algun aña nan por sigui na otro sitio ku nan negoshi i habri espasio pa otro persona ku ke start un negoshi.
