Premiashon Weganan Eskolar Interinsular

WILLEMSTAD/KRALENDIJK- Minister di Enseñansa, Siensia, Kultura i Deporte (ESKD) sr. Sithree van Heydoorn i un delegashon tabata presente na e kluosura di Weganan Eskolar Interinsular ku a tuma lugá 12 mart 2023 na Magazina di Rei na Boneiru. E weganan a konta ku partisipashon di delegashonnan di Aruba, Boneiru, Kòrsou i Saba.

Por mira bèk riba un enkuentro Interinsular pa deportenan di Ahedres i Dam eksitoso ku a keda organisá pa INDEBON ku kolaborashon di IBISA di Aruba i FDDK di Kòrsou. Durante di e klousura Minister di ESKD sr. Sithree van Heydoorn, Presidente di Parlamento di Aruba sr. Edgard Vrolijk,  representante di Saba sra. Lauren Risley huntu ku Diputado enkargá ku Deporte di Boneiru sr. James Kroon a hasi entrega di trofeo na tur ganador i tambe a entregá un medaya na tur partisipante.

Minister S. Heydoorn ta felisitá tur hóben ku a partisipá na e enkuentro komo ku e interkambio akí ta enrikesé nan na vários manera. Nan a konosé un otro kultura, krea amistatnan nobo i siña mas di e deporte ku nan ta praktiká. Alabes Minister ta felisitá tur e hóbennan ku a sa di konkistá un premio den e weganan akí ku ta den kategoria di ahedres: Liana Pieter ku a keda na di tres lugá i Ri-anna Rafaela ku a konkistá e título máksimo den kategoria di mucha muhé den e deporte di Dam. Minister ta gradisí tambe tur e coachnan ku a guia e hóbennan. Un danki na selekshon di Kòrsou ku a keda guiá pa Stallone Isenia i Faye Vas di FDDK. Tambe ta bai un palabra di gratitut na e coachnan Raoul Alias, Rose-Anne Cesaria Rifaela, Jimmy Izijk i Deanella Cirino. Sigui ku e bon trabou, boso aporte ta balioso pa desaroyo di nos muchanan.

Ministerio di ESKD ta felisitá i gradisí:

• Selekshon di Ahedres di Kòrsou: Liana Pieter, Edline Toribio Lugo, Nahla de Lanooi, Giane Zink, Jei-Peng Wu, Mateo Gomes Casseres, Christian Toppenberg i Naydeon Liberia
• Selekshon di Dam Kòrsou: Ri-Anne Rafaela, Nashely de la Paz, Kyrenah Lacle, Mia de Lanooi, Arnaigel Pieter, Bredjean Bouthisma, Luwenzi Manuela i Qa-id Willems.

 E siguiente Weganan Eskolar Interinsular ta tuma lugá na Kòrsou di dianan 24 pa 26 di mart di 2023 i esaki ta pa e kategoria di deporte di atletismo i trefbal. Minister di ESKD sr. Sithree van Heydoorn huntu ku su ministerio i FDDK ta den preparashon pa ku e enkuentro deportivo aki.

 —

KOMUNIKASHON

 **Riba e potrètnan athunto por tuma nota di e klousura i entrega di premiashon. Pa mas potrèt por bishitá e página di facebook di Ministerio.