Preparashon pa Karnaval 2023

WILLEMSTAD – Minister di Enseñansa, Siensia, Kultura i Deporte (ESKD) sr. Sithree van Heydoorn, ta partisipá na pueblo di Kòrsou ku gruponan di karnaval por kuminsá ku preparashon pa selebrashon di Karnaval 2023.

Ministerio di ESKD huntu ku Minister S. van Heydoorn a tene kombersashon ku diferente departamentu di Gobièrnu i vários organisashonnan karnavalesko. Durante di e kombersashonnan akí a tene kuenta ku diferente aspekto ku ta di importansha pa preparashon pa yega na Karnaval 2023. Huntu a yega na e akuerdo ku ta stimulá pueblo di Kòrsou pa prepará mas mihó ku ta posibel pa e temporada di Karnaval 2023.

Punto di salida ta pa mihó tur grupo di karnaval ta bon prepará pa karnaval, pa evitá ku preparashonnan ta kuminsá na último momentu. Mientrastantu Gobièrnu di Kòrsou ta sigui vigilá e desaroyo rònt di e pandemia di COVID-19. Speransa ta ku e kontágionan no tin influensia grave pa nos pueblo, di manera ku nos marchanan por kontinuá i pueblo por selebrá karnaval di un forma responsabel den 2023. Mas informashon tokante di Karnaval 2023 lo keda publiká den e periodo benidero.

 Minister di ESKD sr. Sithree van Heydoorn ta urgi pueblo di Kòrsou pa sigui kuida nos salú, ounke ku e reglanan di COVID-19 ya no ta aplikabel.

MAS NOTISIA

Ministerio konserní: Enseñansa, Siensia, Kultura & Deporte