Publiká riba 16 Sèptèmber 2025
WILLEMSTAD – Awe 16 di sèptèmber 2025, a tuma lugá un enkuentro di Asosiashon di Riferonan di Kòrsou huntu ku Promé Minister Pisas. Direktor di Weganan di Number Kòrsou, gerensha di Curaçao Gaming Authority i kolaboradó di Minister Silvania tambe tabata tei presente.
Siman pasá gerensha di Curaçao Gaming Authority a tene un reunion ku Promé Minister Pisas pa papia tokante supervishon i sistema di mantenshon di lei. E reunion di awe tabata en konekshon ku esaki i a palabrá ku lo sigui ku esfuersonan pa fortalesé i mehorá e supervishon den e sektor di wega di number na Kòrsou.
E Asosiashon di Riferonan di Kòrsou a ekspresá nan disponibilidat pa sigui traha huntu ku gobièrnu pa modernisá i regulá e sektor akí ku ta benefisiá nos komunidat.
Na final di e reunion Promé Minister Pisas e informá e asosiashon ku Minister Silvania lo sigui ku e trayekto akí pa atendé e plan di akshon, pa yega na un sektor moderno i bon regulá pa ku wega di number di Kòrsou.
