Promé Minister Gilmar Pisas a bishitá e asamblea general di European News Exchange (ENEX)
Publiká riba 08 Òktober 2021
Willemstad – Promé Minister Gilmar Pisas a bishitá e asamblea general di European News Exchange (ENEX) dia 8 di òktober 2021 na Curaçao Marriott Beach Resort.
Durante di e bishitá aki Promé Minister a hiba un diskurso den kual e la gradisí e organisashon di ENEX pa a skohe Kòrsou komo anfitrion pa e asamblea aki.
Den su diskurso Promé Minister a aksentuá tambe e importansia di notisia ku ta keda distribuí den un forma konfiabel, krítiko i ophetivo pa medio di kualkier medio di komunikashon.
E la enfatisá ku nos komunidat ta spera ku di parti Gobièrnu informashon ta keda distribuí rápido, kla i presiso pa medio di kualkier medio di komunikashon ku keda skohé.
Esaki ta enserá ku e relashon entre Gobièrnu i medionan di komunikashon mester ta unu kaminda Gobièrnu ta respetá e parti di independensia di e medionan di komunikshon i di e otro banda Gobièrnu ta spera ku di parti di e medionan di komunikashon por transmití e menshanan ku Gobièrnu ke kompartí ku nos komunidat den un forma rápido, korekto i hustu.
Durante di e asamblea tabatin un momentu tambe pa su ekselensia Mohamed Jalal Al-rayssi, direktor general di “Emirates News Agency”, kombersá ku Promé Minister.
E enterkambio a bai riba aspektonan ku por kumbiní ambos pais.
Ambos, su ekselensia Mohammed Jalal Al-rayssi i Promé Minister Gilmar Pisas, a keda hopi kontentu ku e kombersashon ku nan por a hiba ku otro.
