Promé Minister Gilmar Pisas a kumpli ku famia na entiero di nan defuntu sr. Clovis Lodewijks
Publiká riba 09 Òktober 2021
Willemstad – Promé Minister Gilmar Pisas a kumpli ku famia na entiero di nan defuntu sr. Clovis Lodewijks dia 9 di òktober 2021.
Minister di Enseñansa, Siensia, Kultura & Deporte Sithree van Heydoorn tambe tabata presente na e entiero.
Durante di e entiero Promé Minister i Minister Sithree van Heydoorn a hiba un diskurso.
Un punto ku a resaltá den Promé Minister su diskurso tabata ku sr. Clovis Lodewijks tabata sigur un lider, dirigente di alto grado, den e área di Deporte prinsipalmente.
Banda di esei Promé Minister a asentuá ku banda ku nos ta hinka nos hendenan ku a destaká den Hall of Fame lo ta importante pa nos sigui kompartí nan historia, eksperensia, konosementu i logronan ku nos komunidat i espeshalmente ku nos hóbennan.
Esaki por motivá i enkurashá nos hóbennan aun mas pa nan tambe por krese i desaroyá nan mes den lidernan fuerte, stabil i determiná pa nos komunidat den tur área, basta ku nan hinka e energia, tempu, determinashon, perseveransia i seriedat den tur loke nan ke logra.
Ku sr. Clovis Lodewijks por sosegá na pas i hopi forsa na su famia, amigonan i mundu di deporte.
