Promé Minister Gilmar Pisas a partisipá na aktividat di Dia Internashonal di personanan ku tin desabilidat

Un fecha aki ta keda rekonosé i konmemorá pa Nashonnan Uní i e ta un fecha ku sigur hopi Pais na mundu ta pone atenshon na e personanan ku tin un òf otro desabilidat.

Kontrario na e palabra desabilidat, tabata 12 organisashon ku a bini huntu pa organisá e aktividat kaminda nan a skohe pa selebrá e abilidat ku kada persona ku tin desabilidat ta karesé di dje.

Esaki ta un gesto hopi bunita i tambe e ta un forma hopi positivo i inteligente pa wak e situashon.

Enbèrdat ta asina ku no ta pa motibu ku un persona tin un desabilidat, esaki ta nifiká ku e no por tin niun otro tipo di “abilidat”.

E tópiko ku Nashonnan Uní ta trata e aña aki ta “liderazgo i partisipashon di e personanan ku tin diskapasidat den un mundu inklusivo, aksesibel i sostenibel di COVID-19”.

E aktividat tabata unu hopi impreshonante kaminda entre otro Promé Minister sr. Gilmar Pisas a personifiká un persona ku ta den stul di rueda, Parlamentario sra. Ana-Maria Pauletta mester a personifiká un persona ku ta siegu, konsehero di Promé Minister sra. Roxienne Albertina mester a personifiká un persona ku ta siegu, i representante di Minister di Desaroyo Sosial, Labor i Bienestar sr. Artoir Herera mester a personifiká un persona ku ta den un stul di rueda.

Esaki tabata un eksperensia úniko pa kada persona ku tabatin un ròl spesífiko durante di e aktividat interesante aki.

E aktividat a kuminsá ku un orashon, después a kana di Fort Amsterdam bai Brionplein i riba Brionplein a sigui un seremonia kòrtiku kaminda Promé Minister por a hiba palabra.

Na final a entregá un karta na Promé Minister den kual ta hasi menshon di algún punto di atenshon ku ta regardá e bienestar i nesesidatnan di nos hendenan ku tin un desabilidat aki na Kòrsou.

“It is not our disabilities, it is our abilities that count” – Chris Burke.