Promé Minister Gilmar Pisas a partisipá na e di 77 seshon di asamblea general di Nashonnan Uní

Willemstad – Promé Minister Gilmar Pisas a partisipá na e di 77 seshon di Asamblea General di Nashonnan Uní di 19 pa 23 di sèptèmber 2022.

E Asamblea General di Nashonnan Uni a tuma lugá finalmente despues di 3 aña en persona, debí na e pandemia. Na apertura di e Asamblea General Promé Minister sr. Pisas a presensiá 3 spich. E promé spich tabata di Sekretario General di Nashonnan Uni, sr. António Guterres. Sekretario General sr. Guterres a pone un enfoke riba e guera na Ukrania i na e krísis klimatológiko. Tur dos krísis tin mester di solushon multilateral sigun sr. Guterres. E siguiente spich tabata di e Presidente di Brasil, sr. Jair Bolsonaro ku a papia tokante e esfuersonan di su Gobièrnu pa ku kon a dil ku a pandemia di COVID-19 i medio ambiente. E delaster spich tabata esun di e Presidente di Chile, sr. Gabriel Boric ku a kritiká e invashon di Rusia na Ukrania, e krísis klimatológiko i e fluho migratorio di Venezuela ku ta pone un preshon tremendo riba nan institushonnan i sosiedat.

Durante di e Siman di Alto Nivel (High Level Week) di Asamblea General Promé Minister sr. Pisas a haña e oportunidat pa tabata oradó durante 3 evento paralelo ku a tuma lugá.

Esakinan tabata:

1. E seshon di “Blue Leaders, catalyzing efforts to protect the ocean through a global network of highly and fully protected marine areas”. E seshon a keda kordiná pa Bèlgika i Nigeria i Promé Minister sr. Pisas a haña oportunidat pa sera konosí i kombersá ku e vise Promé Minister di Bèlgika sr. Vincent Van Quickenborne. Durante e seshon aki Promé Minister Pisas a anunsiá ku Reino lo bira miembro di e inisiativa di “Blue Leaders”, pa asina pone un enfoke importante riba nos oséano.
2. E seshon di “The Resolve to Act on Early Warnig for All”. E seshon aki a keda kordiná pa Finlandia i e Organisashon Meteorológiko Mundial (WMO);
3. i e seshon di “Act on Water to feed the World”, kual seshon a keda kordiná pa e Minister di Komersio Eksterior i Koperashon di Desaroyo di Hulanda sra. Liesje Schreinemacker.

Durante di e seshonnan aki Promé Minister sr. Pisas a splika kon importante un sistema di alerta tempran tin pa henter mundu, espesialmente mirando ya kaba kuantu fenómenonan ekstremo meteorológiko ku e kambio klimatológiko ta kousando.

E la splika kua ta e etapanan ku ya Kòrsou ta avansá den dje, kual nan ta e.o.: krea un “Off Shore Marine Sanctuary” di mas grandi den Karibe; krea 6 zona mas chikí di reprodukshon di piská adishonal ku e ophetivo pa mehorá e protekshon i e maneho di nos “coral reef ecosystem”; hasi posibel pa nos zona di kosta ta mas resistente pa ku e situashon di kambio klimatológiko; apoyá siensia marítimo; i krea un mekanismo finansiero pa finansiá e parti di oséano.

Promé Minister sr. Pisas a splika tambe ku e ta nesesario pa haña solushon pa ku e desaroyo sostenibel di awa, inkluso e seguridat di alimento i e medionan di bida sostenibel. Logrando e seguridat di alimentashon i mehorashon di nutrishon ta krusial pa nos por alkansá e agènda 2030 pa ku e desaroyo sostenibel, manera e.o. e SDG 1 tokante 0% di pobresa,  e SDG 3 tokante un bon salu i bienestar, i e SDG 4 ku ta referí na e bida supmarino

https://we.tl/t-EjJhLAU7Xh (Opening General Assambly)

https://we.tl/t-ZKZ9QjvsDV  (Blue leaders)

https://we.tl/t-QOdfJehcJV   (Early Warning Initiative)

https://we.tl/t-UBj23D8oky  (Act on water to feed the world)

Promé Minister sr. Pisas a partisipá tambe na e seshon di Earth4All Side-event.
E seshon aki ta tokante e krísis klimatológiko ku tin na mundu aworakí. E Gobièrnunan di Spaña i Costa Rica a organisá e evento aki huntu Potsdam Institute for Climate Impact Research, the Stockholm Resilience Centre, Norwegian Business School i The Club of Rome. https://we.tl/t-t32ZIcZcJ1 (Earth4All)

E sientífiko i ekonomistanan a presentá e investigashonnan  ku a keda hasí riba e problemátika di kambio di klima. Durante e seshon nan a presentá e buki ku nan a skibi ku tur nan modèl, senario i konklushonnan yamá “ Earth for All: A Survival Guide for Humanity”. Durante e seshon a para ketu na e kambionan ekstraordinario ku tin mester pa dil ku krísis, desigualdat, pobresa, empoderamiento di muhé, sistema alimentisio i sektor energétiko.

Promé Minister sr. Pisas a topa ku e delegashonnan di Aruba, Sint Maarten i Hulanda na New York. Huntu a partisipá na diferente di e seshonnan ku tabatin.

https://we.tl/t-i0w9MZtXLX (delegashonnan i staf).

MAS NOTISIA

Ministerio konserní: Asuntunan General i Promé Minister