Promé Minister Gilmar Pisas a reuní ku e sindikato di SGTK
Publiká riba 01 Novèmber 2021
Willemstad – Promé Minister Gilmar Pisas a reuní ku e Sindikato di SGTK dia 1 di novèmber 2021.
Esnan ku a representá e Sindikato tabata srs. Cova, Harms i Mardenborough.
Durante di e reunion e representantenan di e sindikato a kompartí diferente di nan preokupashon ku Promé Minister relashoná ku e situashon di trabou di e trahadonan di Kontratista.
Alabes nan tabatin diferente pregunta pa ku e proseso di Refineria, PMO i CORC.
Durante di e reunion e Sindikato a vosiverá nan deseo pa por sera konosí ku e direktor interino nobo na RdK (Refineria di Kòrsou), sr. Patrick Newton.
Promé Minister a yama e direktor interino durante di e reunion aki i a regla un reunion mesora entre e Sindikato i e direktor interino pa e mesun fecha, kual ta 1 di novèmber 2021.
Esnan ku a representá e Sindikato na RdK tabata srs. Cova, Harms, Snijders i Mardenborough.
E Sindikato a kompartí diferente sugerensia tambe ku Promé Minister i e direktor interino di RdK pa ku kon trata pa mantené algun di e trahadonan di kontratista na trabou, pendiente finalisashon di tur e desaroyonan ku ta andando.
E direktor interino di RdK a indiká ku ta importante pa krea kupo di trabou ku ta útil, pues lo tin di indiká spesífikamente ki tipo di trabou ta esensial na e momentunan aki.
Alabes e direktor interino a indiká ku mester kuminsá mesora ku algun proyekto pa asina evitá ku nos por perdè tur nos hendenan ku tin e eksperensianan nesesario pa aki ratu ora nos tin di bai operá e Refineria.
Ambos reunion a kana den un bon esfera kaminda e Sindikato por a risibi diferente informashon di parti e direktor interino di RdK i tambe Promé Minister.
