Promé Minister Gilmar Pisas, Minister Cooper i Minister van Heydoorn a reuní ku representantenan di FLOW
Publiká riba 18 Òktober 2021
Willemstad – Promé Minister Gilmar Pisas, Minister di Tráfiko, Transporte i Planifikashon Urbano Charles Cooper i Minister di Enseñansa, Siensia, Kultura i Deporte Sithree van Heydoorn a reuní ku representantenan di Flow dia 18 di òktober 2021.
Esnan ku a representá Flow tabata sra. Inge Schmits (CEO Cable & Wireless) i Ruchi Kaushal (General Council Cable & Wireless), srs. Julio Spiegel (VP of Government Affairs Liberty Latin America), Philip A. Matthews (Vise President and General Manager of Dutch Caribbean), Rauf R. Engels (Statutory Director) i Danny N. Macaya (Country Manager Curacao/Bonaire).
E motibu di e reunion tabata pa e representantenan di Flow por sera konosí ku e Gobièrnu aktual i alabes duna informashon pa ku kiko nan a bini ta hasi pa trata di mehorá e situashon pa nan usuarionan aki na Kòrsou. Esaki ta enserá entre otro halsa e kapasidat i velosidat di spit di Internet, mantenshon i integrashon di e sistema di resibunan di UTS pa Flow.
Di parti di Gobièrnu a atendé i menshoná tur e puntonan di preokupashon ku tin bou di e usuarionan di Flow aki a Kòrsou i kua ta e maneho ku Gobièrnu di Kòrsou lo bai hiba pa ku e parti di e infrastruktura di Internet riba tur área.
E kombersashon a kana den un bon esfera kaminda e representantenan di Flow a indiká ku nan lo sigui brinda i mehorá e servisio den su totalidat pa nan usuarionan aki na Kòrsou.
