Promé Minister Gilmar Pisas tabata di bishita na Wardakosta i Defensa

Promé Minister, alabes Minister di Hustisia Gilmar Pisas a pasa Base di Marina Parera i einan a keda risibí ku un seremonia ku un asina yamá ‘guardia arma‘.

Esei ta konta komo muestra di honor na e alto mandatario ku tabata di bishita.

Despues di e resepshon Promé Minister a forma parti di diferente reunion, durante kual e la keda informá tokante diferente desaroyo na Wardakosta i Defensa.

Tópiko di kombersashon tabata entre otro e ehekushon di e ‘landspakket’ pa loke ta trata fortalesé “Estado di Derecho”.

Den esaki ta premirá e ekspanshon di Wardakosta i alabes a palabrá ku Milisia di Kòrsou lo keda profeshonalisá.

Durante di e reunion akí Promé Minister a firma e plan di ehekushon pa lokual ta e fortifikashon di e kòntròlnan riba frontera. Den e plan akí a palabra ku Hulanda ku e shete añanan binidero lo invertí èkstra den e kòntròl di e fronteranan di e paisnan Aruba, Kòrsou i Sint Maarten.

Promé Minister a haña oportunidat pa nabegá un ratu den e boto patruyero di Wardakosta i a kore un ratu den un Anaconda di Defensa.

E materialnan di Wardakosta i Defensa ta forma un parti hopi importante di e tareanan diario di ámbos organisashon.

Durante e bishita na Wardakosta Promé Minister, den su ròl komo Minister di Hustisia, a huramentá tambe un kantidat nobo di personal di Wardakosta.

Komandante di Forsa Naval den Region Karibe, alabes Direktor di Wardakosta Region Karibe, Brigada General di Marina Frank Boots su palabranan: ‘’E bishita di Promé Minister hasí na Base di Marina Parera, ta masha balioso pa nos. Nos por a duna un bon bista di e vários asuntunan di seguridat marítimo ku kua diariamente nos tin di haber.’’